Nongstoiñ, Naitung 14
Ka Federation of Khasi Jaiñtia & Garo People (FKJGP) Rimuliang Circle ka la pynpaw ïa ka jingsngew kyndit kaba khraw haba ïohi ba u Chief Excutive Member (CEM) ka Khasi Hills Autonomous District Council (KHADC), u Bah Pynïaid Sing Syiem u la pyntip hapoh ka Ïing Dorbar Thawaiñ ka KHADC ba ïa ka T.30 lak kaba la mang ban shna ïa ka Police Outpost (PO) ha Langpih la pynkylla noh sha ka Community Hall jong ka Dorbar Shnong Nonglang.
Ha ka kyrwoh khubor ba la phah na ka liang ka FKJGP Riangpoit Mulliang, ka la pynpaw ba ka T.30lak tyngka ka long ka bhah ba la mang kyrpang da ka Excutive Committee ba la dep ha ka jingïalam u Bah Titostarwel Chyne kum u CEM ha ki snem ba mynshwa kaba long ruh kum shi bynta ban theh ïa ki lad jingpynroi (Developement) ha ki thaiñ khappud ka Meghalaya bad Assam.
“Kum ka seng, ngi pyrto ïa kane ka sienjam jong ka KHADC ha kitei ki por kat haduh ba ka la nud ban shim ïa kane ka sienjam kat ban mang haduh kat katei ka song pisa ïa ka thaiñ Langpih kaba long kawei na ki thaiñ kaba kum ka jaidbynriew ngi phai khmat ba ki bor Sorkar la ka long na ka Sorkar Jylla ne ka District Council kin theh ïa ki lad jingpynroi,” la ong ka kyrwoh na ka seng.
“Ngi sngew lyngngoh haduh katta-katta ban ïohi ba kane ka Executive Committe (EC) ba mynta ka la pynkylla noh pynban da kumwei ïa kane ka song pisa sha kata ka Community Hall jong ka Dorbar Shnong Nonglang kaba dei ka shnong ka bym shym hap shuh hapoh ka thaiñ khappud border wat la ka dang hap ha kajuh ka konstitwensi,” la ong ka FKJGP.
Ka seng ka la pynpaw ruh ïa ka jingbynñiaw haduh katta-katta ïa katei ka rai khawpud ba la shim da kane ka EC bathymmai ba la ïalam da u Bah Pynïaid Sing Syiem kum u CEM. Ha kaba ïadei bad ka jingpynshai u CEM halor ka jingpynkylla noh ïa kane ka song jingïarap pisa ïa ka ban tei ïa ka Langpih Police Outpost sha ka Community Hall jong ka Dorbar Shong Nonglang ka long namar ba ka dong ka thaiñ ka long ka bym shongsuk shong saiñ, ka FKJGP ka la pynpaw ba da lei-lei kan ym lah ban pdiang ïa kaba kum kane ka jingong.
“Kane ka jingpynshai jong u ka la ïalam bakla shibun eh ïa ki 30 ngut ki MDC hapoh ka Ïing Dorbar ha KHADC bad ïa ka jaidbynriew hi baroh kawei namar kumba ka long mynta, kiwei-kiwei ki skhim kiba la ïoh sha ka thaiñ ki ïaid beit shaid-shaid bad kim ju don kino-kino ki jingthud. Balei tang kata ka Special Scheme ka KHADC ym lah ban pyntrei,” la ong ka seng.
“Ka KHADC ka la dei ban don ruh ïa ka jingïa pynbeit bad ka tnad kam pohïing ka Jylla ban pyntrei ïa kane ka ïingmala ba la mang ha Langpih khnang ba kan ïaid beit ïaid ryntih. Nalor kata, lada ka dei ruh ban pynkylla noh sha kata ka Community Hall, balei ka KHADC kan leit rah noh shaduh ka Shnong Nonglang? Hato ki briew ha ka thaiñ khappud Langpih kim donkam Community Hall shuh seh mo? Ngi pynrem jur ïa u MDC ka thaiñ, u Bajop Pyngrope uba la don bynta ban pynkylla khongpong wat ïa kiei-kiei kiba la long,” la ong ka seng.
Ka la ong ruh ba ha ka jingshisha, shuwa ba un leh ïa kane u la dei ban ïasyllok bad ki nongshong shnong ka thaiñ la ka long ïa ki Sordar Shnong ne ki ‘riew rangbah ka thaiñ, hynrei kane ka jingleh jong u, khlem da ïasyllok bad ki nongshong shnong ka pynrit mynsiem bad pynduh jingkyrmen shisha ïa ka dong ka thaiñ hi baroh kawei.
Ka FKJGP, namarkata ka dawa ba ka KHADC kan ym dei ban pynduh jingkyrmen ïa ka thaiñ da kaba shim noh wat ïa kaba ka la ai hynrei ka la dei ban ai shuh-shuh khnang ba kum ka thaiñ kan sngew shngaiñ ba ki bor shynshar ba bat ïa ka riti ka dustur ki dang tip ïa la ki jong ki doh ki snam kiba im jynjar ha ki thaiñ khappud.
Kane ka long ka kyrwoh na u Bah Serbilin Lyngdoh, President FKJGP Rimuliang Circle.
