Shillong, Naitung 14
U Myntri Sorkar Pdeng ba dei khmih ïa ka tnad DoNER bad Communications, u Jyotiraditya Scindia ha ka jingleit jong u sha North Eastern Council (NEC), Shillong u la pyllait paidbah ïa ka ‘web portal’ North East Region Agri Commodity E-Connect (NERACE) bad ka ‘mobile application’ ba la saiñdur ban ai jingmyntoi ïa ki nongrep bad ki nongthied ha ka thaiñ Shatei Lam Mihngi.
Ka NERACE ka dei kaba thmu ban ai jingkyrshan ïa ki mar-rep bad ki mar ‘horticulture’ kum ki musla, ki soh, ki jhur, ki shana dai, ki ‘cereal’, bad ki mar ba mih ha ki khlaw.
Ka jingthmu ka long ban pynïoh ïa ki ïew kiba kham biang na ka bynta ki nongrep, ki lad ïadait dor kiba biang, ka jingbuh dor kyrpang, bad ka jingïoh ïa ki jingtip ha ka por kaba biang. Kan plie lad ruh ïa ki nongthied ban ïakynduh markhmat bad ki nongdie, ka jingïoh ïa ki mar kiba bha, ka jingsiew jingdiah, ka jingpynkhreh, ki jingïadait dor, ka jingkyrshan ha kaba ïadei bad ki kam ‘logistic’, bad kyntiew ïa ki jingïadei kiba jrong samoi.
Haba kren halor ki jingmyntoi jong ka NERACE, u Myntri u la ong, “Ka jingangnud ïa ka India kaba lah ban kyrshan hi dalade- ‘Atmanirbhar Bharat’ bad ka ‘Viksit Bharat’ yn lah ban pynurlong haba ngi don ïa ka ‘Atmanirbhar Northeast’ bad ka ‘Viksit Northeast’ bad haba phi kren shaphang ka ‘Atmanirbhar Northeast’ bad ka ‘Viksit Northeast’ kata ka jingshisha ka shong tang ha ka ‘Viksit’ bad ka ‘Atmanirbhar Annadata’ – ki nongrep jong ka thaiñ Shatei Lam Mihngi.” U la ong ruh ba u kyrmen skhem ba lada peit ïa ka jinglong-jingman jong ka India kaba thymmai kaba lah ban kyrshan hi dalade, ki nongrep ki dei ban long kiba hakhmat eh na ka bynta kata ka jingkylla kaba kyrpang bad lyngba ka NERACE, ki nongrep bad ki ‘Annadata’ ha ka thaiñ ym tangba kin ïoh ka jingpynïasoh bad ki ïew hapoh Jylla, ha ka thaiñ Shatei Lam Mihngi bad ha ka ri hynrei yn pynïasoh sha kylleng ka pyrthei.
