New Delhi, Naitung 14
Ka Kong Balarishisha Nongspung kaba leit bylla ri khyllung ha Noida kaba hap ha jylla Uttar Pardesh ka la pyllait por khnang ha ka Sngi U Blei ka 14 tarik Naitung 2024 ban leit thied sohtrun ba la wanrah na Meghalaya ba la die ha Dilli Haat, New Delhi kaba la kut ha ka Sngi U Blei.
Ka Kong Balarishisha ka dei shnong trai najan Bhoirymbong, Ri Bhoi district. Ka la wan bylla ri khyllung naduh u snem 2013 bad ki longïing kiba dei na ka jaidbynriew Assamese.
Haba ïakren bad ka Kong Balarishisha, ka la ïathuh ba ka la wan sha ïew die sohtrun ha Delhi haba ka la ïohi ïa ki khubor ba la mih ha sngi sdang ba ka don kane ka ïew. Kumta ka la pynbeit bad ki paralok ban leit thied sohtrun mynta ka sngi.
“Nga la thied sohtrun ban rah sha jaka sah ban ai lang ïa ki trai ïing ban ïoh mad ïa u sohtrun u bathiang na jylla lajong” ka la ong.
Ka la ïathuh ba ka ju ïoh mad ïa u sohtrun na kiwei ki jylla um da bang, hynrei u sohtrun na Meghalaya u da bang shisha khamtam mynta ka por shit.
Ka la pyntip ba ka ju leit sha shnong arsien ha ka shisnem.
Ha kane ka sngi u nongthoh khubor jong U Nongsaiñ Hima u la ïakynduh ruh ïa ar ngut ki samla kynthei Khasi, kawei kaba pule ha Noida bad kawei kaba pule ha Pondicherry. Kine ki samla ki la pynpaw ka jingsngewkmen haba ki ïoh ban mad ïa u sohtrun na jylla lajong.
Kawei ka samla kaba pule ha Noida ka la ïathuh ba mar shu ïathuh ba dei na Meghalaya ki briew ki la tip namar ka jingbang u sohtrun.
Ka la pynpaw haba ka ïoh bam sohtrun ka kynmaw ïa ka ïing lajong ha Shillong.
Katba kawei ka samla na Mawkyrwat kaba pule ha Pondicherry bad kaba wan pyntbit shibnai ha Delhi, ka la pynpaw ka jingkmen haba ka la ïoh mad ïa u sohtrun lajong.
