New York, Naitung 14 (UNI)
U President barim ka Amerika, u Donald Trump u la mynsaw ha kaba ka Federal Bureau of Investigation (FBI) ka la pyntikna ïa ka jingjia kum ka jingthmu pynïap katba u dang ïashim bynta ha ka jingïalap na bynta ka ilekshon President ha Butler, Pennsylvania ha ka janmiet Sngi Saitjaiñ, la ong ki ophisar.
U Trump, ïa uba la pynkynriah noh na ka rynsan ïalap ha ryngkat ka jingkhah snam ka durkhmat, u la lait na ka jingma, la ong ka tnad Secret Service.
Utei u President barim ka Amerika ha ka rynsan lad pathai u la ong ba u la shah siat da u kuli uba la ksam “ïa ka bynta ba halor jong ka shkor kamon jong nga”. Ka kynhun ïalap jong u ka la ong ba u Trump um lei-lei.
U briew ba donkti ban siat ïa u Trump lem bad uwei pat u ‘riew paidbah uba don lang ha katei ka jingïalang ki la khlad, la ong ka tnad Secret Service ka Amerika ha ka kyrwoh.
“Uwei u nongpeitkai u la shah pynïap, 2 ngut kiwei pat ki nongpeitkai ki la mynsaw jur. Kane ka jingjia ka don hapdeng ka jingtohkit bad ka tnad Secret Service ka la pyntip sha ka Federal Bureau of Investigation,” la ong ka kyrwoh.
“U briew ba suba donkti ban siat u la ther bun kuli sha ka jaka ïalap ilekshon jong u President barim na ka jaka ba jrong – shabar jong ka jaka ïalap,” la ong ka tnad Secret Service.
“Ki dkhot ka Secret Service ka Amerika ki la ïoh ban siat ïa utei u briew – uba la ïap mynta. Ka Secret Service ka Amerika ka la jubab mardor ha ryngkat ki lad jingïada bad u President barim u la lait na ka jingma bad la pynkynriah noh ïa u,” la ong ka kyrwoh.
Ka FBI ka la ñiew ïa katei ka jingjia kum ka jingthmu pynïap pyrshah ïa u Trump, la ong ka khubor ka CNN.
“Hynne janmiet, ngi la don ïa kaei kaba ngi ñiew kum ka jingthmu pynïap ïa u President barim, u Donald Trump,” la ong u Special Agent In-Charge ka FBI-Pittsburgh Field Office, u Kevin Rojek haba kren sha ki lad pathai khubor ha Butler.
Ka FBI ka la pynithuh ïa utei uba donkti kum u Thomas Matthew Crooks bad ong ba u la siat bunsien na ka tnum ïingmala kaba shabar jong ka jaka ïalap ilekshon shuwa ban shah pynïap ha ki dkhot ka Secret Service.
U la ong ruh ba ka jingtohkit ka dang ïaid ban lap ïa ka daw halor katei ka jingthmu pynïap ïa u President barim ka Amerika.
U President ka Amerika, u Joe Biden uba don ha Delaware u la pynrem jur ïa katei ka jingjia bad kren ïa u Trump hadien katei ka jingjia, la ong ka White House.
Shuh shuh u Biden ha ka kyrwoh u la ong ba u sngewnguh shi kat dei ba u Trump u don hapdeng ka jingshngaiñ bad manbha.
Katkum ka khubor na ka CNN, uwei u sakhi u la kam ba u la ïathuh ha ki ophisar ba u la ïohi ïa u briew ha ryngkat ka suloi uba la ryngkang na shiliang sha shiliang tnum, tang khyndiat minit shuwa jong katei ka jingjia.
