Shillong, Naitung 14
U MDC ka Mawlai u Bah Teiborlang Pathaw u la ong ba un pyntikna ba ka Mawlai Mawroh kan nym mih na Mawlai konstitwensi namar kaei kaba la kdew ha ka kaiphod jong ka Delimitation Co-mmittee la dep ïatai hapoh ka Executive Committee bad wanrah sha Ïingdorbar ka Khasi Hills Autono-mous District Council (KHADC) bad mynjur ban phah sha ka Select Committee ban khmih bniah biang shwa ban wanrah biang sha Ïingdorbar. Haba ïakren bad ki nongthoh khubor, u Bah Pathaw u la ong ba ka jingtreikam jong ka Delimitation Committee ka long kaba laitluid bad ka la pyndep la kajong ka kamram ha kaba ym lah ban tuklar ïa ka kam jong ka.
U la ong ba ynda la ïohpdiang ïa ka kaiphod jong ka Delimitation Committee u la kren hapoh ka Executive Committee ha kaba la ïakren lang ïa ki shnong kiba la kdew da ka Delimitation Committee ban rah na kawei ka konstitwensi sha kawei pat kum ka jingïabiang lang.
Ha kaba ïadei bad ka Mawlai konstitwensi, ka Delimitation Committee ka la buh ïa ka Mawlai Mawroh sha Jaïaw konstitwensi. U Bah Pathaw u la ong ba wat lada ka Mawlai konstitwensi ka dei kaba heh, hynrei na ka liang jong u, u la pynsngew ba ki shnong kiba don ha Mawlai, ki dei ban don beit hapoh Mawlai konstitwensi.
Hadien ba la thaw ïa ka Select Committee, na ka liang jong u, u la pynsngew ruh sha u Chairman ka Select Committee u Bah PN Syiem uba dei ruh u Dy CEM ka KHADC ba ka Mawlai Mawroh kan don beit hapoh Mawlai konstitwensi.
Hynrei u la ong ba dei tang ka Mawpat kaba la lait na Mawlai konstitwensi namar ka don ruh ka jingkwah na ka liang ka shnong ba kan lait noh na Mawlai konstitwensi.
Haba kular ba ki shnong kiba don ha Mawlai konstitwensi ha ka MLA ilekshon kin don ruh kumjuh ha ka MDC ilekshon, u Bah Pathaw u la ong, “nga kular ba ka shnong Mawroh ka dei ban don beit hapoh Mawlai konstitwensi.”
U Bah Pathaw u la kyntu ruh ïa ki paidbah khamtam ïa ka shnong Mawroh ban nym don kano-kano ha kaba ïadei bad kane namar ma u kum u MDC u pyntikna ba ka Mawroh kan nym mih na Mawlai konstitwensi bad baroh ki shnong kiba don kumba long ha ka MLA kin long hi kumjuh ha ka MDC.
Ha kawei pat ka liang, ka Select Committee ka lah ban ïakynduh mynta ka taïew kaba long ka jingsdang ban pynïaid ïa ka kam shakhmat. Ki dkhot ka Select Committee ki kynthup ïa u Chairman Bah PN Syiem, u nongïalam ka Liang Pyrshah u Bah Titosstarwell Chyne, Bah Jambor War, Bah Bindo Lanong, Bah Lambor Malngiang, Bah Balajied Rani nalor u Member Secretary.
