Tura, Naitung 14
Kum shi bynta jong ka jingkhynra ïa ki kam khaïi drok be-aiñ, ki pulit ka South West Garo Hills ha ka Sngi Saitjaiñ ki la kem noh ïa 3 ngut ki briew kiba donkti ha ki kam khaïi drok bad kurup ruh ïa u drok lem bad kiwei-kiwei ki tiar na ki.
Ka jingshah kem bad ka jingkurup drok ka la wan hadien ka jingkhynra ba kyrpang jong ka tnad Anti-Narcotics Task Force, hapoh ka jingïalam u Deputy Superintendent of Police (HQ), South West Garo Hills, lem bad ki ophisar bad ki langrut na Monabari Outpost (OP) bad Garobadha Outpost Guard Camp (OGC) ha ka thaiñ Borkona kaba hap hapoh Monabari OP (Ampati Police Station).
Kitei 3 ngut kiba la shah kem la ithuh kum u Mostafa Sheikh (24 snem ka rta), Meter Ali (32 snem ka rta) bad Nur Abdin (24 snem ka rta). Kine baroh 3 ngut ki dei na Assam. Ki tiar ba la kurup na kine briew ki kynthup ïa 11,000 tylli ki dawai kuli ‘Methamphetamine’ (Yaba) kiba khia 1.06 kilo, 3 tylli ki ‘mobile phone’, 2 tylli ki thuk-thuk bad ka tari.
Katkum ka jingïathuh ki pulit, la pynngat mukotduma ha thanat Ampati hapoh jong ka Narcotic Drugs and Psychotropic Substances (NDPS) Act, bad ka jingtohkit ka dang ïaid shakhmat.
