Tang 2 kynta hadien ba shah siat, sdang die ïa ki ‘T-Shirt’ ba don ka dur u Trump

Hynrei hapdeng kane ka jingkyndit, ki la don pat kiba la sdang pynmih ïa ki sopti phong lane T-Shirt kiba don ka dur jong u Donald Trump hadien ba u la shah siat.

New Delhi, Naitung 14

U President barim ka US, u Donald J Trump, u la mynsaw malu-mala hadien ba uwei u briew u la siat da u kuli ïa u bad uta u kuli u la dei salit na ka shkor kamon. Kane ka jingjia kaba la pynkyndit ïa ka pyrthei baroh kawei ka la jia ha Pennsylvania ha ka por ba u Trump u dang pynlong ïa ka jingïalang paidbah na ka bynta ka ilekshon President ka ban long mynta u snem.

Hynrei hapdeng kane ka jingkyndit, ki la don pat kiba la sdang pynmih ïa ki sopti phong lane T-Shirt kiba don ka dur jong u Donald Trump hadien ba u la shah siat.

Katkum ka khubor ba la pynmih ha ka kotkhubor South China Morning Post, tang hapoh ar kynta hadien ba u Trump u la shah siat, ka song banyngkong jong ki T-Shirt ka la paw ha ka rynsan die jingdie ‘Online’ ïa kaba la tip kum ka Taobao ha China.

Ka Li Jinwei, 25 snem ka rta bad kaba ju die ïa ki mar ki mata lyngba ka Taobao, ka la lah ban buh ïa ki T-Shirt ha ka rynsan ‘Online’ hashwa ban step ha China. Ka karkhana jong ka, ka don ha Hebei, bad kane ka karkhana ka shimpor tang 30 sekon eiei ban pyndep shna.

“Ngi la buh ban tyrwa die ïa ki T-Shirt ha Taobao mar ïa ïohi ïa ka khubor halor ka jingshah siat wat la ha kato ka por ngi khlem pat dep shna ïa ki T-Shirt. Hynrei tang hapoh lai kynta, ki la don palat 2,000 kiba la pan thied ïa ki T-Shirt na China bad na US,” la ong ka Li Jinwei.

Katkum ka kotkhubor Politico, ka jingshna ïa kitei ki T-Shirt ka khlem dei tang ha China. Ka kompani na US ïa kaba la tip kum ka HodgeTwins ka la buh da ki dur jong ka T-Shirt ha ‘X’ bad ha kine ki sopti la thoh “Fight! Fight! Fight!” Nalorkata, ka la ong ba ka jingmih na ka jingdie ïa kine ki T-Shirt kan leit sha ka jingsynñiang pisa na ka bynta ka jingïalap ilekshon u Trump.

Sa kawei pat ka dur ka don ïa ka jingthoh kaba ong “Shooting Makes Me Stronger” katba sa kawei pat ka thoh “I Will Never Stop.”