Shillong, Naitung 14
U President ka Meghalaya Pradesh Congress Committee (MPCC), Bah Vincent H. Pala u la bthah ïa baroh ki Block Congress Committee (BCC) ban sdang pynithuh noh ïa ki kyrtong na bynta ka ilekshon MDC ban wan.
U Bah Pala u la ong ïa kane haba ai jingkren ha ka jingïalang pynkup burom dang shen ïa u MP ka Tura, u Saleng A. Sangma kaba la long ha nongbah Shillong.
“Ka ilekshon MDC ka la jan wan, lehse ka lah ban long mynta u snem ne la shem snem. Kumta ngin ïaid shakhmat bad ka kam, bad ngin sa shong jingïalang,” la ong u Bah Pala. Ha kajuh ka por, haba kyrpad ïa baroh ki President jong ki Block, District, ban lum ïa ki jingïalang, u la kren shai ba kim donkam ban pan jingbit na ka MPCC haba ïadei bad kane ka bynta.
“Ka Block ka lah ban ïaid shakhmat ban pynithuh ïa ki kyrtong, kumjuh ki distrik. Kumta nga kyrpad ïa phi baroh ban sdang pyntreikam noh ïa ki ophis jong ki block bad distrik bad ban wad ïa ki kyrtong. Shu buh ka WKH ne EJH ne WJH, kino-kino ki kyrtong kiba phi don, sdang phah noh ki kyrteng…lada ngim pat don, ngin wad ïa ki,” u la ong. U President u la ban biang ba ym donkam ban ap haduh ban da ïoh lut ïa baroh bad sa phah ïa ki kyrteng, hynrei kiei kiba la don lypa, dei ban sdang noh naba bun na ki nongïalam, nongtrei bad nongkyrshan, ki la kynjoh ktien sha u ban pyntikna haba ïadei bad kane ka liang.
“Ngim donkam ban pynbna ïa ki kyrteng namar ïa kane yn sa leh da ka komiti ba dei khmih, hynrei ka jingpynithuh ïa ki kyrteng lah ban leh da ki Block, phah sha ki distrik bad ki distrik kin sa phah pat sha ngi,” la ong utei u khleih nongïalam ka MPCC. Shuh shuh haba kyrpad biang ïa ki dkhot ka seng ban sdang noh ïa ka kam bad ym ban ap haduh ban da pynbna ïa ka ilekshon, u la bynrap, “Kiwei-kiwei ki seng ki la biang lypa ki kyrtong, hynrei ïa ngi, ngin hap sdang naba sdang ban wad kyrtong. Kumta nga kyrpad ïa phi baroh ban sdang treikam noh halor kane, nai ap.”
Haba pynsngew dang shen u la dep phah shithi ban ïaid noh shakhmat haba ïadei bad katei ka kam, u Bah Pala u la ong ba shen ka seng kan sa pynlong jingïalang halor kane.
