Nongstoiñ, Naitung 15
“Naduh ka dohnud ka jong nga, nga wan ha kane ka por ban ong khublei shibun ïa phi ki nongkyrshan ïa ka VPP kiba la kyrshan met bad mynsiem, shisha ka rupa bad ksiar ngim shem lah ban ai ïa phi hynrei kaei kaba ngi ju kular ka long ïa kaban shakri hok ïa phi ki paidbah bad ban nym shet kylla ïa phi ki paidbah, ïa ka ri bad ka jaidbynriew,” la ong u Dr. Ricky A.J Syngkon MP bathymmai jong ka Shillong Parliamentary haba kren ha ka jingïa-lang ai khublei jong ka Voice of the People Party (VPP) ïa ki paidbah ka Nongstoiñ bad ka West Khasi Hills District kaba la pynlong ha Nongstoiñ ha ka Lah Sngi U Blei jong ka taïew.
U Dr. Ricky u la pynpaw ruh da kaba ong, “Khlem ma phi ngin nym lah ban leh eiei bad khlem ma phi ngin nym poi sha kata ka thong.”
U la ïathuh ruh ba ha ka por ba u don ha Parliament u da sngew sarong bad wat la u don marwei hynrei um shym la sngew ba u don marwei namar ba u tip ba U Blei ïa kaba ma u, u shaniah u don ha syndah bad ryngkat ki paidbah kiba kyrshan, ka ai mynsiem shikatdei eh bad u ïeng hangto ban ïeng ban kren ïa kiba bun ki nongrim jong ka seng bad kaba u sngew sarong ka long ba hadien ka jingkren ki don ïa shibun bah kiba wan ban ai khublei.
U MP u la ong ruh, Nga da sngew sarong bad da ka mynsiem kaba sngewnguh eh ïa U Blei, nga ju ïeng ban ong ba shisha ym don kano-kano kaba eh bad kano-kano ka bym lah bad U Blei.”
U Dr. Ricky u la ong ruh ba kane ka jingïaid lynti, ka dang dei tang ka jingsdang jong ka jingïaid sha kata ka lawei kaba don ha ka, kata thong lane ka jingïohi jngai kaba ong ïa ka ban pynim pat ban pynbha pat bad ban pynkylla dur.
“Nga ngeit ba kata ka jingïohi jngai ka jong ngi kan nym kut tang ha kane ka Jylla ka jong ngi hynrei nga ngeit kan sa poi ka por bad ngam artatien ba kane ka jingïohi jngai ka jong ngi kan long ruh kata ka juh kaba kiwei ruh ki thrang namar kumba ma nga bad ma phi ngi la mad ïa ki jingeh lyngba kine ki sanphew ar tylli ki snem, ngi sngewthuh ïa kita ki shiah kiba thar, kum ka bamsap, ka jingleh donbor, ka jingleh shilliang khmat bad don bun kiwei ki shiah kiba thar ïa nga bad ïa phi ki paidbah bad kumta ngi mih shakhmat ban weng ïa kine ki shiah kiba la ktah jur ïa ngi,” u la ong.
Ha kane ka jingïalang ai khublei ka VPP nalor u Dr. Ricky, la don lang u Bah Ardent Basaïawmoit, President ka seng, u Bah Brightstar Marbaniang MLA ka Mawlai, ki ‘riew rangbah, ki longkmie ki longkpa, ki paidbah kiba la wan ban sngap bad kiwei kiwei.
