Nongstoiñ, Naitung 15
U President ka Voice of the People Party (VPP) u Bah Ardent M Basaïawmoit u la buh ka jingkyntu ïa ki paidbah ba kin long kiba skhem jingmut bad kiba stad bad kiba sian ban nym liat ha ki jingpynthame kiba bun ki ban wan nangne shakhmat.
U Bah Ardent u la kren ïa kane ha ka jingïalang ai khublei ka VPP ïa ki paidbah ba la pynlong ha Nongstoiñ, ha kaba u la pynpaw ba kumba long mynta ki la don ki jingpynsngewthuh bakla ïa u paidbah, ban pynbabe ïa u paidbah uba la ai ka jingkyrshan ïa ka VPP naba lada kim lah ban leh kumba ki la kular ka jingïaid lynti ka jong ki ha ka politik ruh ka la kut. “Mynta ka la dei ka pali bad ka aiom ka jong u Prah ba un sdang ban synshar ïa kane ka Ri kaba ieit eh ka jong ngi da ka jingsynshar kaba khuid kaba suba,” la ong u Bah Ardent.
“Ko! ki paidbah ngi wan ban ai khublei ïa phi bad ha kajuh ka por ban kyntu ïa phi ki paidbah ba phin long kiba skhem jingmut, kiba stad bad kiba sian ba phin nym liat ha kine ki jingpynthame,” u la ong.
U Bah Ardent u la ong ruh ba mynta u tip ba kiwei ki seng ki la pynkhreh ïa ki mat ban leit sha ka ilekshon MDC, ki ong ba kin ther ïa ka VPP halor ki lai tylli ki mat bad kata ka dei ka jingpynkhreh ban leit sha u paidbah. Kawei ka mat ki ong kin ther halor ka ai jait kpa, kin ther ruh ïa kata ka article 371 kaba thmu ban pynduh District Council, bad kawei pat ki ong kin kren ruh ïa kato ka jaka jong ka District Council ha Mawkyrwat ïa kaba ka District Council kam pat lah ban kam trai.
“Nga, nga sngew sammut ba naduh ba ïaleh ilekshon la bun tylli, jait shi jait kpa, Article 371 bad mynta mih thymmai sa ka jaka ha Mawkyrwat, haba phim lah ban kam trai ïa kata ka jaka ha Mawkyrwat phin wan ïakynduh ïa u paidbah, u paidbah u dei ban kylli balei phim lah ban kam trai ïa kata ka jaka,” la ong u Bah Ardent da kaba u la bynrap ba kiwei ki seng kim don shuh da kiwei pat ki mat ban sei sha u paidbah lait na kata ka jait kpa, ka article 371 bad lait na kata ka jaka ha Mawkyrwat.
