Shillong, Naitung:
Ka tnat Law jong ka skulbah North-Eastern Hill University (NEHU) ryngkat ka jingïatreilang bad ka Indian Council of Social Science Research – North Eastern Regional Centre (ICSSR-NERC) ka la pynlong ïa ka workshop kaba shi sngi kum shi bynta ban ai jingshai kham bniah halor lai tylli ki aiñ runar bathymmai “Three New Criminal Laws 2023.”
Ïa kane ka workshop kaba shi sngi ba la pynlong ha NEHU ha ka Sngi Saitjaiñ, ban ai jingpyntip kaba bniah halor kitei ki aiñ kiba thymmai, la plie da ka Director General of Police (DGP) ka Meghalaya Kong I Nongrang, IPS.
Haba ai jingkren, ka Kong Nongrang ka la ngam jylliew halor ki bynta kiba donkam jong katei ka aiñ bad ka la ban ïa ki jingdonkam ban don ka jingkitkhlieh bad ruh halor ki kyndon bad ki Standard Operating Procedures (SOP) ban pynthikna ïa ka hok. Shuh shuh ka la pynpaw ruh halor ki jingeh ki ban wan lyngba ki kor technology bathymmai katkum katne ka juk mynta, kum ka jingshim sakhi lyngba ki kor ‘electronic’, kiba ïadei bad kine ki aiñ.
Nalor ka DGP, la ïadon lang u Professor DK Nayak, Vice Chancellor In-Charge jong ka NEHU, Professor JJ Mozika, u khlieh ka tnat Law, NEHU, nalor kiwei kiwei.
Ha kane ka workshop la don ruh ka jingïatai bad ïathir halor kine ki aiñ ba la pynïaid da ka Kong N Nongkynrih, Director jong ka Directorate of Forensic Science, Shillong ha kaba la ïadon lang ruh ki ‘riewshemphang kiba kynthup u Advocate SP Mahanta, Senior Advocate jong ka High Court of Meghalaya; u Ronak Kumar, Public Prosecutor, CBI; u Bipul Das, DSP ka tnat Crime Branch bad u Rajesh Kumar Jaiswal na ka NEPA.
