Ka Khasi Hills Autonomous District Council (KHADC) ka la buh da ka Select Committee na ka bynta ban khmih biang ïa ka jingpynbeit ïa ki konstitwensi hadien ba ka Delimitation Committee ka la dep ban ai ïa ka kaiphod halor ka jingpynbeit thymmai ïa ka jingdon ki nongthep vote bad jinglong jingman ha ki 29 tylli ki konstitwensi ha East Khasi Hills, West Khasi Hills, South West Khasi Hills, Eastern West Khasi Hills bad Ri-Bhoi. Ka Delimitation Committee ka la aiti ïa ka kaiphod jong ka ha ka 8 tarik Naitung. Hadien ka jingïatai hapoh ka Ïingdorbar KHADC, la rai ban ban phah ïa ka kaiphod jong ka Delimitation Committee sha ka Select Committee ïa kaba yn khlieh hi da u Deputy CEM Bah PN Syiem, uba bat ïa ka tnat Elaka. Kiwei pat ki dkhot kiba don ha ka Select Committee ki long u Nongïalam ka Liang Pyrshah Bah Titosstarwell Chyne, u Bah Jambor War, u Bah Bindo M Lanong, u Bah Lambor Malngiang bad u Secretary ka Executive Committee kum u Member Secretary.
Ngim tip kan shimpor katno ïa ka Select Committee ba kan pyndep ïa ki jingïakynduh ki jong ka bad ban wanphai biang sha ka Ïingdorbar KHADC. Lehse ka lah ban shimpor da ki taïew lane wat da ki bnai ruh. Hynrei ngi dei ban kynmaw ba ka sorkar jylla naduh u Lber mynta u snem ka la pynjlan ïa ka samoi treikam jong ka KHADC bad ka Jaiñtia Hills Autonomous District Council (JHADC) sa da hynriew bnai. Ha ka jingshisha, ka ilekshon sha ka KHADC bad JHADC ka la dei ban long ha u Rymphang mynta u snem. Tangba da ka jingpynjlan da hynriew bnai, ka samoi treikam jong kine ki Council kan kut noh ha u bnai Nailar 2024. Bad hadien kata, ka sorkar ka lah ban pynbna ïa ka ilekshon sha kine ki Council ne ka lah ban pynbna da kumwei wat.
Kawei kaba la I donkam ka long ïa ka jingpynmih noh kham bun ki konstitwensi ha KHADC na ka daw jong ka jingbym ïahap shuh ka jingdon ki nongthep ‘vote’ bad ka jingheh ki konstitwensi. Kumba ka long mynta, ka jingdon jong ki shnong ki thaw ha ki konstitwensi MLA kam da ïapher than bad ki konstitwensi MDC. Kawei na ka daw ba ka long kumne ka long namar kito kiba long MDC, ki kwah ruh ban long MLA, bad lada ki shnong ki neh kumjuh ha ka konstitwensi MLA bad MDC, kan kham suk ïa ki ban treikam bad ban leit khroh ‘vote’. Lada phiah bad pynmih kham bun ki konstitwensi, kito ki MDC kiba kwah long MLA ki lah ban mad jingeh namar ka jingïapher jong ki shnong ki thaw. Ha kata ka por, ki lah ban don ar ne lai ngut ki MDC ki ban ïakhun ïa ka ilekshon MLA na kajuh ka konstitwensi namar kin don ki shnong kiba don ha ar ne lai konstitwensi ha ka MDC, hynrei kiba hap beit tang hapoh kawei ka konstitwensi ha ka MLA.
Sa kawei ruh ka mat ka long ba imat ka don ka jingsngew sheptieng hapdeng ki katto katne, khamtam kiba dei mynta ki MDC la ha KHADC ne JHADC, ki bym kwah ïa kane ka ilekshon na ka daw ba ki lah ban shah pynher noh ha ki paidbah nongthep ‘vote’ hadien ba ki la ïohi ïa ka jingmih na ka ilekshon MP Lok Sabha. Ka seng Voice of the People Party (VPP), watla ka dei ka seng kaba dang kham thymmai, ka la sar naphang ha kane ka ilekshon MP haduh ba kan da jop kput syndon. Namarkata, ka don ka jingsheptieng ba lada kane ka lyer VPP ka ïai neh, kiba bun na kine ki MDC kiba mynta ki lah ban hap mad ïa ka jingshah rem, bad ki kyrtong ka VPP kin sar naphang. Lada ngi sngap bad peit ïa ki jingkynthoh sharum shaneng, ki paidbah ki kwah ban ailad noh ïa ka VPP ba kan synshar ha District Council. Lada ka long kumta, dei hok hi ba kiba bun na kine ki MDC kiba mynta kim kwah ban long kloi ka ilekshon namar ka lyer jong ka VPP ka dang jur bad ki lah ban shu shah rem ei kha-ma-kha.
Watla katta ruh, yn ym lah ban pynslem ne pynjlan sah. Ka ilekshon kan hap ban long kumba ka dei ban long, hynrei ngi kwah ruh ban ïohi ïa ka jingmih jong kham bun tylli ki konstitwensi khnang ba ki paidbah kin suk, bad kito ki MDC ki ban sa shah jied ruh kin suk ban treikam. Kiba la nang pynkhreh ïa ka ilekshon ki la sdang ban ïaid shakhmat. Don ruh kiba la dep ban pynpaw paidbah ba ki kwah ban ïakhun. Don kiba dang ïaid sop-sop watla ki paidbah ha kito ki konstitwensi ki la dep tip bad sngewthuh. Ïa mynta, ngin hap ban ïa ap haduh ban da kut ka hynriew bnai kaba ka sorkar jylla ka la pynjlan ïa ka samoi treikam jong kitei ki artylli ki District Council, bad ngin peitkai kumno ka sorkar kan rai.
