Mawkyrwat, Naitung 15
Ha kawei ka jingjia kaba shyrkhei bad kaba pynpar ñiangkhriat, la ong ba lai ngut ki briew kiba dei ki kynthei ki la shah mait da ka wait haduh ba kin da mynsaw jur.
Katkum ki tyllong khubor ba la ïoh na ki pulit la ïathuh ba katei ka jingjia ka la jia ha ka miet jong ka 12 tarik Naitung, 2024 ha ka por hapdeng ka 10.30 bad 11 baje eiei.
Ka tyllong khubor na ki pulit ka la ïathuh ba kitei kiba mynsaw ki dei ki shikmie-shikhun bad uba leh ïa katei ka kam u dei u kurim jong ka khun ba heh ïa uba la tip kyrteng kum u Comingstar Lyngdoh Nonglait ba la 29 ka rta na ka shnong Shaid-Shaid Umoid ha South West Khasi Hills District.
Nalor nangta, ka tyllong khubor ka la ïathuh ruh ba utei u briew u la mait shwa ïa ka kurim jong u, ka Kong Ribahun Kharwar, 23 snem rta hadien kata u sa mait sa ïa ka kiaw ka Kong Ridalin Kharwar, 43 snem bad bud sa ïa ka para kynsi ka Kong Wandashisha Kharwar, 19 snem.
La ïathuh ruh ba utei u briew u la leh ïa katei ka kam ha ka por ba u la don hapdeng ka jingshoh khawiang bad kaba la jia hapoh ka ïing sah jong ki.
Ïa kitei lai ngut kiba mynsaw la pynkit noh wut-wut sha CHC Mawkyrwat da ka 108. Namar ba ka jingshitom ka la jur palat bad kumta la pynkit noh sha Civil Hospital Shillong ban pynïoh ïa ka jingsumar ba kham biang.
La ïathuh ba utei u Comingstar hadien ba u la dep ban leh ïa katei ka kam ha ka step kaba bud kata ha ka 13 tarik u Naitung 2024 u la leit ban aiti noh ïalade ha ki pulit jong ka Mawkyrwat ha ka por kumba 10:30 eiei mynstep.
Ki pulit ki la ïathuh ruh ba ha kaba ïadei bad katei ka jingjia, ki la pynrung mukotduma pyrshah ïa u bad ka jingtohkit mynta ka dang ïaid shakhmat.
