Nongpoh, Naitung 15
U Director jong ka North Eastern Indira Gandhi Institute of Health and Medical Science (NEIGRIHMS), Prof (Dr.) Nalin Mehta u la ong ba ka jingpule doktor kam dei satia ka kamkai bad kam dei satia tang ban long doktor lane u nongsumar, hynrei ban long ruh ha kajuh ka por kum kita ki nongai jingmut, ki paralok, ki nonghikai, ki nongkdew lynti, ki nongsneng kiba stad ïa ki briew kiba wan shah sumar ha ki.
U Director ka NEIGRIHMS u la kren ïa kane sha ki samla pule ha ka jingïalang plie paidbah ïa ka ‘Meghalaya Star 30: Guiding Aspirations for NEET Exams’ kaba la pynlong da ka State Council of Science, Technology, and Environment (SCSTE) ka jylla Meghalaya ha State Institute of Rural Development (SIRD) Campus, Nongsder, Ri Bhoi District ha ka Lah Sngi U Blei.
U Prof. Mehta u la ong ruh ba ka jingleit pule doktor kam dei satia ban long da ka jingpynbor jong ki kmie ki kpa, ki bahaïing bahasem lane ki paralok, naba kata ka dei ka jingphohsniew ka jong ki bad ym jong ki nongpule da kaba ai jingmut ba tang kito kiba don shisha ïa ka jingphohsniew, ka thong bad ka jingkut jingmut nalade ki dei kiba lah ban leit pule doktor.
“Haba nga phai biang sha u snem 1981 ha ka por kaba nga dang dap 17 snem ka rta ban leit pule MBBS, ha kito ki por ngim pat da don bun ki kolej bad ka jingïakhun ban ïoh pule doktor ruh ka dei kaba pyrkhing bad eh haduh katta katta,” la ong u Prof Nalin Mehta bad bynrap ba kane ka prokram kaba la plie paidbah kan ïarap ïa ki samla pule ba kin ïoh ïa ka jinghikai bad ka jingstad ba kin lah ban ïoh rung bad pule doktor ha ki kolej bapher bapher jong ka ri.
U la ban jur ruh halor ka jingdonkam ban bate ïa ka por ha ka jingpule bad ka kam sngewbha da kaba ong ba kito ki samla kiba don ïa ka jingmut ba ki wan hangne na ka bynta ban pynlong kum ka jingïabam khana, shibynta ki dei eh, namar lada ki lah ban leh sngewbha artad ryngkat bad ka jingtrei shitom, kaba mut ki lah ban pynurlong ïa kata ka jingphohsniew ka jong ki.
U la pynshlur ruh ïa ki samla pule ba ki dei ban long kiba don jingtip shaphang ki jingjia kiba manla ka sngi ha ka imlang ka sahlang nalor ki jingpule, da kaba ong ba um kwah satia ban ïohi ïa ki doktor ‘ñiang bam kot naba ka kamram ka jong ki, kam dei satia tang ban long u doktor, hynrei ban long ruh ha kajuh ka por kum kita ki nongai jingmut, ki paralok, ki nonghikai, ki nongkdew lynti bad ki nongsneng kiba stad ïa ki briew kiba wan shah sumar ha ki.
Kum ban shu kdew hangne, ka Meghalaya Star 30, ka dei ka prokram ba kyrpang jong ka sorkar jylla kaba thmu ban ai jinghikai bad jaka sah ei sha ki samla pule ka jylla kiba la pyndep ïa ka eksamin klas 12 ha ka laiñ saïan na ka bynta ba kin pyntbit ïalade ban ïakhun ïa ka NEET/JEE eksam ban ïoh leit pule doktor ha ki kolej bapher bapher jong ka ri da kaba phai khmat kyrpang ruh ïa ki samla pule kiba duna ha ka ïoh ka kot bad kiba wan na ki thaiñ nongkyndong.
Ha kane ka sngi plie paidbah ïa ka prokram ha Nongsder, la wan ban ïadon ryngkat ruh da ka SR Marak, Director jong ka SIRD, u Gunanka DB, Member Secretary jong ka SCSTE lem bad kiwei kiwei ki heh ophisar bad ki samla pule ka jylla.
