Khliehriat, Naitung 15
Ki pulit ka East Jaiñtia Hills ha ka 15 tarik Naitung ki la kem sa arngut ki briew kiba la suba donkti halor ka jingshah pynïap ba itriem jong saw ngut ki briew ha ka shnong Umpleng, East Jaiñtia Hills District.
U Superintendent of Police (SP) ka East Jaiñtia Hills u la pyntip ba ka jingkem ïa ki briew kiba la suba donkti ha ka jingshah pynïap jong saw ngut ki briew ka la kiew sha ka lai ngut, kata hadien ba la dep kem shwa ïa uwei mynshem taïew halor ka jingjia shah pynïap jong saw ngut ha kaba ïa ka metïap jong ki la lap ha ka 6 tarik mynta u bnai na ki bynta ba pajih jong ka shnong Umpleng.
Lah ban kdew ba kine saw ngut ki briew kiba la shah pynïap dusmon ki dei kiba la tip kyrteng kum u Nazar Kyndait 33 snem na Dkhiah East, u Ravi Rai 23 snem na Elam, Nepal, u Rajesh Rai 26 snem rta na Dharan Sunsari, Koshi Anchal, Nepal bad uwei u bym pat lah ban ithuh.
Ha kaba ïadei bad kane ka jingïoh kem ïa kine ki briew, na ka liang ki pulit kim pat shym la pyllait satia ïa ka kyrteng jong ki khnang ba kan ym pynthut ïa ka jingtohkit.
