Shillong, Naitung 15
Ka tnad pulit ha ka Lah Sngi U Blei ka la khot hajir sa ïa ar ngut ki nongïalam jong ka Khasi Students’ Union – Malki Circle ba kynthup ïa u President, samla Ïashan Mukhim bad u Asst. General Secretary, samla Mavian Jyrwa.
“Ka tnad pulit lyngba ka thanat Sadar ka la khot sa ïa 2 ngut ki dkhot ka seng, ïa nga bad u samla Mavian jong ka Malki Circle,” la ong u samla Mukhim haba kren sha ki lad pathai khubor hadien ka jingshah khot hajir.
U la ong ruh ba ka jingkhot hajir jong ki pulit ka long halor ka ejahar bad haba ki dkhot ki la kylli halor katei ka bynta, la shem ba kam don eiei, hynrei ki dei tang ki jingpharep suda na ka liang ka tnad pulit.
“Ka jingleh jong ka tnad pulit ka don jingthmu ban pynduh mynsiem ïa ngi, ban pyntieng pynsmiej ïa ngi, hynrei ka kyrwoh kaba shai ka long ba kane ka jingleh jong ka tnad pulit kam don eiei kum kata ban pyntieng pynsmiej ïa ngi, hynrei kan nang ai mynsiem shuh-shuh ïa ngi ban ïakhun bad dawa na ka Sorkar Pdeng ban pyntreikam noh ïa ka Inner Liner Permit (ILP), kumjuh ïa ka Sorkar Jylla ban pyntreikam noh mardor ïa ka MRSSA hapoh ka Jylla,” la ong u samla Mukhim.
Haba kylli, u la ong ba ejahar ka dei ka ‘suo-moto’ na ka liang ki pulit bad ka dei halor ka jingpharep jrong kti, wat la une u nongïalam u la pynshai ba kam don eiei kaba kum kata. Na ka liang u Vice-President ka KSU-Sengkmie, samla Biangbor L. Paliar uba la wan synran lang ïa ki dkhot ka Malki Circle ha kane ka sngi, u la ong, “Kaei-kaei baroh ka dei tang ka jingthmu jong ka Sorkar lyngba ka tnad pulit ban ñion bad pyntieng pynsmiej ïa ki dkhot jong ka seng.”
“Ngi kwah ban kren da kaba shai sha ka Sorkar…ngi donkam ïa ka ILP, pyntreikam noh ïa ka MRSSA,” u la ong.
Shuh shuh utei u nongïalam u la bynrap, “Ka jingkhot jong phi man-man ka sngi da ka jingthmu ban pyntieng, hynrei kynmaw ba ki dkhot ka seng man-man ka sngi kin ïai khynra ïa ki bar-jylla hangne hapoh ka Bri Hynñiewtrep baroh kawei. Kane ka dei ka kyrwoh sha ka Sorkar.”
