Kwah ka kynhun u MLA, Bah Sanbor Shullai ban ai bhah 27 na ka 100 ïa kiba duna ka ïoh ka kot

Ka Committee ka la ai jingmut ruh ba ïa ka jingai bhah dei ban khmih biang man ka 10 snem.

Shillong, Naitung 15

Ka South Shillong Advisory Committee ka la phah ki jingai jingmut sha ka Expert Committee ban ai bhah kham bun ïa kito kiba don ha ka thup jong ka jingduk bad duna ka ïoh ka kot, kata ka long ban ai 27 na ka 100.

Kane ka Committee kaba khlieh da u MLA ka South Shillong konstitwensi, Bah Sanbor Shullai ka la ai jingmut ruh ban ai bhah 30 na ka 100 ïa ki Khasi Jaiñtia bad 30 na ka 100 ïa ki Garo, 6 na ka 100 ïa ki ST/SC bad OBC, bad 7 na ka 100 ïa ki unreserved.

Haba kren sha ki lad pathai khubor ha ka Lah Sngi U Blei ka 15 tarik Naitung, 2024 hadien ba la phah ïa ki jingai jingmut sha u Bah LK Diengdoh uba dei u Secretary ka Expert Committee, u la ong ba na ka 27 percent ka bhah ïa kiba don ha ka thup jong ka jingduk bad duna ka ïoh ka kot, 87 na ka 100 dei ban bhah ïa kiba duk kiba dei ki Khasi Jaiñtia bad Garo, 6 percent na ki ST, SC & OBC bad 7 percent na ka bynta ki unreserved.

U Bah Sanbor u la ong ba ka committee ka la ai jingmut sha ka Expert Committee na ka bynta ka jingmyntoi ki duk ki jynjar bad nongkyndong ki bym da kham ïoh bhah ha ka ïoh kam ïoh jam.

U la ong ba kiba duna ka ïoh ka kot ki kynthup ïa ki longïing baduk ne B.P.L kum ki khun jong kiba ñiah kali, kiba shong die madan, kiba trei ïing briew kiba bylla sngi bad kito kiba shu trei shipor ha ka kam Sorkar, ASHA, Anganwadi, ki nongrep bad ki nongtrei bylla.

Hynrei ka Committee ka la ai jingmut ba ïa kito kiba dei ki nongtrei bapura ka Sorkar ym dei ban kynthup lang ha ka thup jong kiba duna ka ïoh ka kot lane ‘Economically Weaker Section.’

La ai jingmut ruh ban kynthup kum ki OBC ïa ki bym dei ki ‘riewlum (non tribal) kiba dei hok ki trai Jylla ha kaba kito kiba dei ban shah ithuh kum ki Schedule Caste, dei ban kynthup ïa ki kum ki Schedule Caste.

Shuh shuh u Bah Sanbor u la ïathuh ba ka Committee ruh ka la ai jingmut ruh ba na ka bhah kaba 87 percent ïa ki kam kiba lait ha ki district lane sub-division, dei ban bhah 50 percent na ka bynta kito kiba duna ka ïoh ka kot kiba dei ki Khasi Jaiñtia ha Rilum Khasi Jaiñtia bad na ka bynta ki Garo ha Rilum Garo ha ki kam ki bym donkam ban pynkynriah nawei shawei.

Ka Committee ka la ai jingmut ruh ba ïa ka jingai bhah dei ban khmih biang man ka 10 snem.

Halor ka jingbhah katkum ka Roster, la ai jingmut ban bhah 30 ïa ki Khasi Jaiñtia, 30 ïa ki Garo, 27 ïa kiba duna ka ïoh ka kot.

La ai jingmut ruh ban bhah 10 percent na ka bynta kiba duna dkhot met bad ki briew kiba wanrah nam ha ki kam sports, arts bad culture.