Sngewkhia ka TMC ba sah thylli bun tylli ki kam nos hapoh ka Jylla

Katkum ka jingong u Marak, donkam ïa ka buit treikam kaba kynthup lang ïa baroh ki liang ym tang ban ai jinghikai ïa ki nos hynrei ban pynbiang ruh ïa ki lad ai kam hapoh...

Tura, Naitung:

Ka TMC na Ri-lum Garo ha ka Sngi U Blei ka la buh jingkylli halor kiba bun tylli ki kam nos kiba sah thylli wat hapdeng ka jingduna nos hapoh ka Jylla.

“Katba ka khubor haba ïadei bad ki nos napoh Meghalaya kiba la ïoh ïa ka kabu ksiar ban leit shabar-ri ka long kaba hap ban ai jingïaroh; ka wanrah pat ka jingsngewkhia ïa ka tnad ai jingsumar jong ngi. Da ki spah ngut ki nos napoh ka Jylla (kiba trei shabar), kiba kwah ban wanphai, ki shem ba bun tylli ki jaka ki sah thylli. Kane ka bym lah pdiang. Ka long ka jinglehraiñ ïa ka Sorkar MDA! Phi ap sa ïano pat? Ka long kaba kyndit ba katba ka Sorkar ka kyrshan ïa ki lad ïoh kam ïoh jam shabar-ri, ka ieh noh pat ïa ki jingdonkam ba ïadei bad ki lad jingsumar hapoh ka Jylla,” la ong u nongïalam ka seng samla ka TMC, u Richard Marak ha ka kyrwoh.

U Marak u la ong ruh ba ka jingshaniah ha ki nongtrei kontrak ka pyntroiñ noh haba phai sha ka jingshngaiñ jong ka kam bad ka jingkitkhia ban sumar nongpang kumjuh ba ki nos ki dei hok ban ïoh ïa ki kam kaba skhem ban pyntikna ïa ka jingkhlaiñ jong ki tnad ai jingsumar, ha ka jaka ban long tang kum ki nongtrei kontrak ba shi por.

“Ki bor pynïaid hapoh u Myntri Rangbah, u Conrad K. Sangma ki la pynleit jingmut ban phah ïa ki nos shabar-ri ha ka jaka ban shimkhia ïa ka jingdonkam ba kyrkieh na bynta kito kiba la pyntbit ha ka kam ha la ïing. Kane ka jingbakla ka kdew shai ïa ka jingbym itynnad haba ïadei bad ka jingkular ka Sorkar haba phai sha ka koit ka khiah bad ka bha ka miat jong ki nongshong shnong jong ka,” u la kynnoh.

Katkum ka jingong u Marak, donkam ïa ka buit treikam kaba kynthup lang ïa baroh ki liang ym tang ban ai jinghikai ïa ki nos hynrei ban pynbiang ruh ïa ki lad ai kam hapoh ka Jylla.

U la ong ba na ka liang ka seng, ka kyntu ïa ka Sorkar ban pyntreikam ïa ki mat treikam ki ban pynkup bor ïa ki nos napoh ka Jylla bad pynbiang sha ki ha ryngkat ki kabu hapoh ka Jylla, da kaba phai khmat ruh ha ka liang ka jingïapher ka jingïoh, jingshngaiñ ha ka kam bad ka jingkiew jong ki ha ka kam.