Nongstoiñ, Naitung 14
Ka Silchin R. Sangma, nongshong shnong ka shnong Nengchigen, West Khasi Hills (WKH) ka la buh ïa ka jingujor hakhmat ki pulit pyrshah ïa u kpa lajong hadien ba u la pynjulor ïa ka ïingsah (kaba ka sah) namar ka jingbym ïasngewthuh jingmut hapdeng jong ki haba ïadei bad ka jingïoh kurim thymmai u kpa, u Monen G. Marak.
Ha ka ejahar kaba la ujor ha ka 12 tarik Naitung ha thanat Shallang, ka Silchin ka la ïathuh ba ka jingsdang ka dei namarba u kpa jong ka u la wan ïalam ïa ka kurim thymmai sha ïing hadien ka jingkhlad noh ka kmie jong ka mynta la palat 2 snem.
Kumba ka long, ka la bthah ïa u kpa lajong ban ïoh jingbit shuwa halor ka jingshongkurim thymmai na ki dkhot jong baroh Ar Kur: Ronding (ka Kur jong ka kurim ba la khlad) bad Mongri (ka Kur jong ka kurim bathymmai).
Katkum ka ejahar, ha ka 7 tarik Naitung, ka jingïalang ka la long ha ïingsah ka Silchin hapdeng ki dkhot jong ka Kur, ha kaba ka Kur Mongri ka la rai ban shim biang noh ïa ka kynthei ha ryngkat ka jingbyrngem ba um dei shuh ban don bynta ha kum kine ki kam hadien-habud.
Ha kajuh ka por, ka Kur Rongding ka la rai ba yn phah biang noh ïa u kpa sha ïing ki kmie ki kpa jong u namar kane ka jingleh bakla.
U kpa uba la bitar lep (Monen) hadien kane, u la ther tyngeh ïa la ka khun khatduh ha ryngkat ka jingbyrngem pynïap ha shuwa ban pynjulor da kaba pynpra phom ïa ka ïingsah ka khun jong u, ka Silchin.
“Ha ka 9 tarik Naitung, u la wan sha ïing bad byrngem pynïap ïa nga bad phah ruh ïa nga ban mih noh na kata ka jaka. Namar ka jingtieng, nga la phet. Hadien kane, u la ïaid shakhmat bad pynpra ïa ka ïingsah jong nga. U la shim noh ruh ïa ki tiar donkam ba kynthup ïa ki kot ki sla jong ka bri rep dieng-jri ka kmie jong nga, ka ID ilekshon jong ka, ‘bank passbook’, 6 tylli ki ‘dakmandas’, 3 song ka tin CGI. Ka jingduhnong baroh haba ngi la kheiñ kan kot kumba ?2 lak,” la ong ka ejahar na ka khun.
Haba kyrpad ïa ka jingpynshitom kaba tyngeh pyrshah ïa u kpa lajong halor ka jingleh jong u, ka Silchin ka la ong ba mynta kam don ïing don sem ban shong ban sah wat la ka jingjur slap ka jur bha hapoh ka thaiñ.
