Nongpoh, Naitung 15
U MLA ka Nongpoh u Bah Mayralborn Syiem, u la buh ka jingkyntu sha ki bor pynïaid district ka Ri Bhoi kiba dei ruh ha kajuh ka por ki bor ba khmih ïa ka thung kam thung jam jong ka District Selection Committee (DSC) ka Ri Bhoi ba kin pyrkhat bad ai bhah kyrpang ïa ki samla trai shnong jong ka Ri Bhoi ha ki kam bapher bapher.
Ïa kane u Bah Mayralborn u la kren hadien ka jingïalang bad u Abhilash Baranwal, Deputy Commissioner ka Ri Bhoi uba dei ruh ha kajuh ka por u Chairman ka DSC lem bad u Raja Brahma, Secretary ka DSC. Ha kane ka sngi la ïadon lang ruh u MDC ka Nongpoh, Bah Balajied Rani nalor kiwei ki dkhot jong ka DSC.
U Bah Mayralborn u la ong ruh ba ka jingpynlong ïa ka jingïalang ha kane ka sngi ka dei halor ka jingud jingnam jong ki samla wad kam bad ki kmie ki kpa ki jong ki kiba la wan ban kynduh ïa u na ka por sha ka por halor ka jingpynslem ban pynmih ïa ka risol jong ka eksamin thung kam ka DSC kaba la pynlong naduh ki snem 2020-21.
U la ïathuh ruh ba ka daw jong ka jingslem pynmih ïa ka risol jong ka eksamin DSC kaba la pynlong ha u snem 2020-21 ka dei namar ba ka DSC ka hap ban pynbiang ïa ka Rooster System kumba la pynbeit da ka sorkar jylla. U MLA u la pynpaw ruh ïa ka jingkyrmen ba hapoh une u Nailar ne slem eh ruh ha u Nailur yn sa lah ban pynmih ïa ka risol, da kaba kyrpad ïa ki samla wad kam bad ki kmie kpa ki jong ki ba kin ïai shah shipor.
Sa kawei pat ka mat kaba la ïatai ha kane ka jingïalang ka long halor kiba bun ki kam kiba dang lait thylli ha ki tnat treikam sorkar bapher bapher ha ka district ha kaba na ka liang u MLA, u la buh ka jingkyntu sha ki bor pynïaid ka district ba kin shimkhia bad leh noh kham kloi ban khot thep kam noh ïa kine ruh katkum ka Rooster System kumba long ha ka jylla baroh kawei.
