Shillong, Naitung:
Ka HYC Mawthadraishan Circle hapoh ka jingïalam u President, samla Shembor Langrin ha ka Sngi Saitjaiñ ka la ïoh ban pynkha biang sa kawei pat ka shnat treikam jong ka seng hapoh ka shnong Rngisawlia, Eastern West Khasi Hills District.
Ïa kane ka shnat treikam jong ka seng la tip kum ka HYC Rngisawlia Unit.
Ïa ka jingïalang la pynlong hapoh ïingdorbar shnong Rngisawlia, ha kaba u Asst. Secretary ka HYC Mawthadraishan Circle, Bah Kmerding Marweiñ u la long kum u Shongknor.
Ha shuwa ban sdang ka jingïalang, la ïoh ka jingduwai na u samla Wiseman Kharbani bad la ïoh ruh ïa ka jingkren lyngkot na u Vice-President ka HYC-Mawthadraishan Circle, Bah Bhakupar Parïong.
Ïa ki nongkitkam ka HYC Rngisawlia Unit la ïoh ban pynskhem da u President ka HYC-Mawthadraishan Circle, u samla Shembor Langrin.
Haba kren kum ka jingkyntu kynpham, na ka liang u samla Shembor u la ong ba ban rung hapoh ka HYC hap ban ïa kit ïa bah ïa ki kam hapoh ka imlang-sahlang bad ban shakri ïa ka Jaidbynriew, hap ban sdang naduh ka dong ka thaiñ bad ka shnong lajong .
“Kum ki dkhot ka seng, hap mad bun ki jingeh bad lada rung hapoh ka HYC da kaba thmu ban ïohnong ïalade shimet, bha ban ym rung,” la ong u samla Shembor.
Haba pynkut ïa ka jingkren, u la ong, “Wat khmih lynti ba ka HYC kan ai eiei ïa phi, hynrei kylli ïalade kaei kaba ngan leh ïa ka Jaidbynriew lyngba ka HYC.”
Ki nongkitkam jong ka HYC Rngisawlia Unit ki kynthup ïa u President, samla Tamnestar Thabah, Vice-President, samla Boyan Parïong, Secretary, samla Sankli Swer, Asst. Secretary, samla Powerfull Thabah lem bad 8 ngut kiwei pat ki nongkitkam bad dkhot ka Unit.
