Shillong, Naitung 15
Ka Jylla Meghalaya kaba la duna lypa ki nongtrei bylla ka lah ban nang ïakynduh jingeh shuh shuh ban pyndep ïa ki projek namarba ki nongtrei bylla kiba nabar kin nym nud ban wan trei shane hadien ba la bteng ka jingkhynra ïa ki nongtrei bylla kiba nabar Jylla.
Haba ïakren bad ki ophisar jong ki tnat treikam ka Sorkar Jylla kiba peit ïa ki jingtei jingshna naduh ka jingtei ïing bad jingshna surok, ki la ong ba ka Jylla kam pat lah ban pynbiang ïa ka jingdonkam ïa ki nongtrei bylla tang ki trai muluk.
Ki la ong ba ki don bun tylli ki projek ha kaba ki nongpyntrei ki buh da ki nongtrei bylla kiba nabar Jylla namar ym lah ban pyndap tang da ki nongtrei bylla kiba dei ki trai muluk.
U la ai nuksa ïa ka jingshna ïa ki surok khamtam ki surokbah ha kaba ki kompani ki hap ban wanrah nongbylla lang nabar Jylla lym kumta ym lah ban pynsted ïa ki projek.
Naduh ba la don ka jingkhynra ïa ki nongtrei bylla ha kylleng, ki la ong ba bun ki kompani ki sheptieng bad ki nongtrei bylla ruh kim kwah ban wan kheiñduh ïa ka jingim namar kin shu shah shoh shah pynmynsaw ei.
“Ngi lah ban shem jingeh kum ka Jylla ban pyntrei ïa ki projek kiba hap ban trei da ki nongbylla kiba nabar khamtam ki kam kiba ym lah ban trei da ki briew ka Jylla,” la pynpaw uwei na ki ophisar.
Kine ki ophisar ki la ong ba ka dei ruh ka kamram jong ki nongpyntrei ïa ki projek ban pynrung kyrteng ïa ki nongtrei bylla namar ka aiñ ka don haba wan ïalam ïa ki nongtrei bylla na shabar jylla.
