Shillong, Naitung 16
Ka Sorkar Jylla lyngba ka tnat pule puthi kan sa leit kyrpang sha kito ki jaka pule kiba duna ka jingdon kiba pass ban tip ïa ki jingeh kiba ïakynduh khnang ban lah ban thawlad ban pynbha kumjuh ruh ban shim ki lad ki lynti namar ka jingjur kiba ieh shiteng por ïa ka jingpule.
Ha ka eksamin Secondary School Leaving Certificate (SSLC) ki don bun ki skul ha kaba ki khynnah kiba pass ki duna bha bad ki don ruh ki skul kiba ym don pass tang iwei ruh.
U Myntri ka tnat pule puthi ka Jylla, u Rakkam A Sangma u la ong ba ka tnat pule puthi kan leit sha kito ki jaka pule kiba khlem lah ban leh bha ha ki eksamin khnang ban tip ïa ki jingeh, la ka dei na ka daw ka rukom hikai, ne ka daw bym biang ki nonghikai ne kino-kino kiwei pat ki daw khnang ba ka Sorkar kan lah ban shim ki sienjam ban pynbha.
U la ong ba ka Sorkar ha kine ki ar snem ka la shim ruh ki sienjam naduh ka jingwanrah ïa ki kot pule kiba long ryngkat kum sha kiwei ki jaka bad yn sdang ruh ïa ki kynja program kum ka jingïarap ïa kito ki skul bad kin lah ban lehbha.
U Myntri u la ong ba ki don ki skul kiba la lah ban lehbha shisha wat ha ki thaiñ nongkyndong hynrei ki don ruh ki skul kiba khlem lah ban lehbha wat lada ki don ha ki jaka sor.
U la ai nuksa kum ha East Khasi Hills district kaba don shibun tylli ki Secondary skul ha kaba ka jingdon kiba pass ka dang kham duna lada ïanujor bad kiwei pat tki district kum ha Jaiñtia Hills.
Kumta u la ong ba ka Sorkar kan sdang ïa ki prokram ha kum kine ki skul khnang ban kyntiew lang naduh ka rukom hikai bad ban sngewthuh ruh kumno ki nonghikai bad ki khynnah ki long ha kito ki skul.
U la kubur ba ka Jylla ka ïakynduh eh ha ka liang ka pule puthi namar kiba bun ki daw naduh ka jingieh shiteng por ïa ka jingpule bad kiwei kiwei ki daw kiba pynlong ruh ïa ka Jylla ban hiar sha ka kyrdan kaba kham shatrai katkum ka jingbuh kyrdan ïa ki Jylla bapher bapher ha ka liang ka pule puthi.
Ha ka jingshisha ka Meghalaya ka dei kawei na ki Jylla barit kaba bun bha ki skul bad bun ki nongseng skul shimet hynrei ka Jylla ka sakhi ruh ïa ka jingdon da ki spah tylli ki skul kiba don tang khyndiat ngut ki khynnah skul bad bun ruh kiba pep skul shiteng por.
Ha kine ki khyndiat snem, ka tnat pule puthi ka la lap ba ki don ym duna ïa 200 tylli ki skul kiba don khynnah tang hapoh 10 ngut bad kum ïa kine ki skul ha ka jingshisha dei ban khang noh shisyndon.
