Shillong, Naitung 16
Ka jingïakren ba ka Jylla kan lah ban shaniah dalade ïalade ha ka jingpynmih doh bad kiwei kiwei ki mar ka dei ka lynti ïaid kaba dang jngai namar wat tang ïa ki khun syiar kiba dei ban ri bad pynheh pynsan dang hap shaniah na shabar Jylla, khlem da ïakren ïa ka dawai bad ki lad jingsumar nalor ki jingbam ban aibam ïa ki jingri ba kin khlaiñ bad ban heh kloi.
Ka seng ki nongri jingri khamtam kiba ri syiar kaba tip kum ka Meghalaya Poultry Farmers’ Association (MPFA) ka la ïakynduh ïa u Myntri ka tnat ri jingri, u Bah AL Hek ha ka Sngi Ba-ar ha kaba ka la pynsngew ïa kine ki jingduna kiba ka Jylla kam pat lah ban shaniah dalade ïalade bad ka la banjur ruh shaphang ka jingkoit jingkhiah jong ki jingri khamtam ki mrad kiba wanrah sha kane ka Jylla na ka bynta ban shohdoh.
Haba kren sha ki lad pathai khubor, u President ka MPFA u Bah Daminot Sylliang u la ïathuh ba ha ka jingïakynduh bad u Bah Hek la ïakren shaphang ka kam ri jingri bad ki jingeh kiba ju ïakynduh ha ka kam ri syiar.
U la ong ba haduh mynta ka Jylla kam pat lah ban pynmih hi na kane ka Jylla ïa ki jingdonkam jong ki jingri naduh ki jingbam, ka dawai, bad ki khun syiar bad ïa kane dang hap shaniah ban wanrah nabar Jylla.
U Bah Sylliang u la ong ba ka seng ka la kyrpad ïa u Myntri ban phaikhmat lem sha kiwei pat kiba ri jingri kum kaba ri syiar kumba ka Sorkar ka la phaikhmat sha kiwei ki kam kum ka Milk Mission, Piggery Mission bad kiwei kiwei ban kyntiew ïa ka rukom ri jingri.
“Ngi kwah ba ka Sorkar kan kynthup sa ïa ka Poultry Mission na ka bynta ïa ki nongrep kiba ri syiar kumba la phaikhmat sha kiba ri sniang bad pynmih dud,” la kyntu u Bah Sylliang.
U la ong ba u Myntri u la kular ban peit ïa kane bad yn sa ïakynduh biang ban ïakren shaphang kane.
U Bah Sylliang u la ïathuh ba na ka liang ka seng ka la pynsngew ruh hakhmat eh ha kaba ïadei bad ka jingpeit bniah ïa ka jingkoit jingkhiah ki jingri kiba wanrah nabar sha kane ka Jylla bad dawa ban buh da ka khyrdop kyrpang ban peit ïa ki mrad kiba wanrah sha kane ka Jylla khamtam ha ki jaka khappud khnang ba kan long ka jingshngaiñ ïa ki nongbam doh.
Kumta ka MPFA ka la dawa ban buh da ka ‘quarantine check gate’ ha Ri Bhoi namar ym tip satia ki mrad kiba wan nabar ki long kiba kumno.
U Bah Sylliang u la ïathuh ba ka Sorkar ka la thied jaka bad ïoh tei ïa ka quarantine check gate ha Ri-Bhoi district ha 20 Mer bad u Myntri u la ïathuh ba kane ka quarantine check gate kan poi kumba T.13 klur.
Hynrei ka MPFA ka la banjur hakhmat u Myntri ba un shimkhia ban sdang noh shwa da ka check gate kaba shipor katba dang ap ïa katei ka jingtei kaba pura ha 20 Mer khnang ba ki mrad kiba wanrah sha Meghalaya kin long kiba koit bad shngaiñ ïa ki nongbam doh.
