Shillong, Naitung 16
Kawei ka briew ha ka 15 tarik mynta u bnai, ka la ujor ejahar ba ha ka 13 tarik Naitung ha ka por kumba 2 baje mynstep, ki runar ki bym ithuh satia (kumba 10-11 ngut) ha 2 tylli ki kali – ML-05Z-5084 bad ML-11-4375, ki la shoh la dat ïa u khun jong ka bad kiba shipara arkmie bad u da ki tiar ha Dhankheti, Shillong. Namar kane, u khun jong ka, u la mynsaw jur bad la pynkit noh ïa u sha jaka sumar.
Ha kane kajuh ka sngi, kawei ka briew na Lawjynriew, Nongthymmai, Shillong ka la ujor ejahar ba ha u snem 2023, ka la shim ram T.2.5 lak ha ryngkat 10% ka sut (man u bnai) na kawei ka briew kaba sah ha Laitumkhrah, Shillong, na bynta ban thied ïa kawei ka kali ‘Hyundai’ (Creta), bad buh bynda ruh da ka ‘Registration’ jong ka kali ha katei ka briew. Hynrei, wat hadien ba la dep siew T.35,10,000/-, katei ka briew ka la leh baheh ïa ka (nongujor) bad knieh noh ruh ïa ka kali.
Uwei u briew uba kyrteng u Westar Marak ha ka 15 tarik mynta u bnai u la ujor ejahar ba ha ka 12 tarik Naitung ha ka por 1.10 mynsngi, 3 ngut ki briew – Jim Ch Marak (42 snem ka rta), Ranseng Ch Marak (30 snem ka rta) bad Jahangir Sangma (23 snem ka rta), baroh na ka shnong Rongrong Antidam (EGH), ki la dawa T.3 lak na u ha Rongrong Bazar (EGH). Kumjuh, ha ka 19 tarik Naitung ha ka por kumba 6.30 janmiet, kitei kiba la shah kynnoh, ki la dawa T.3 lak bad byrngem-byrsit ruh ïa u.
Ha ka 15 tarik mynta u bnai, u Raithing N. Marak u la ujor ejahar pyrshah ïa u Westar Marak, da kaba kynnoh ba um shym la lah ban pyntreikam ïa ki kam kiba la mang hapoh ka Japan International Corporation Agency (JICA) ha ka shnong Rongrong Antidam (EGH), katkum ki kyndon ba la buh. U nongujor u la ujor ruh ba u Westar Marak, um shym la lah ban pyni ïa ka ‘work order’ sha ki nongshong shnong, pynbakla ïa ka jingpynrung kyrteng jong ki nongshong shnong, siew T.700/- ha jaka T.1,190/-sha ki nongïoh myntoi, pynduna ïa ki sngi trei na ka hynriew sha ka saw sngi bad kynnoh ruh ba u don bynta ban pyntrei ïa ki khynnah hapoh 18 snem ha kitei ki kam.
Nalor kitei ki jingjia, uwei u briew ba kyrteng u Savio M. Marak ha ka 15 tarik mynta u bnai u la ujor ejahar ba ha ka 11 tarik Naitung, u la lap ba T.13 lak ka la jah na ïingsah jong u kaba ha Imbloka (SGH). U nongujor u suba jur ba uwei u nongshong shnong na ka shnong Malbijora u don bynta ha kane ka kam.
