Umroi (Meghalaya) Naitung 16 (UNI)
Ka jingkilan met hapdeng ki shipai India bad Mongolia ka la kut noh ha ka Sngi Ba-ar ha Umroi Cantonment, Meghalaya.
Katei ka jingkilan met kaba 14 sngi kaba la ai kyrteng, ‘Nomadic Elephant’ ka la kyntiew ïa ka jingïatreilang ha ki kam ïakhun khynra bad pynbha ïa ka jingïasam jingtip lyngba ki kor ka juk stad mynta bad ka jingïadei hapdeng ki shipai jong kine ki 2 ri ba ïateh lok.
Kane ka jingkilan met ka la khring lang ïa ki shipai jong ka Sikkim Scouts lem bad kiwei-kiwei ki dkhot na kiwei pat ki tnad ïada bad ka 150 Quick Reaction Force Battalion jong ka tnad shipai Mongolia.
Ïa ka jingïalang pynhap pyrda la sakhi lang da u Chief of General Staff jong ka tnad ïada ri ka Mongolia, Major General Ganbyamba Sunrev bad General Officer Commanding ka Trishakti Corps, Lieutenant General Zubin A. Minwalla.
“Katba ka jingïalang ka dang ïaid, ki nongïalam na baroh arliang ki la ïadon bynta ha ki jingïamir jingmut kiba tei na bynta ki jingkilan met kiba hadien-habud, kum ka dak ban pyni ïa ka jingïadei ba ïajan bad ka jingburom kaba la urlong na kane ka jingkilan met. Kane ka jingïasam markylliang ka la ban jur halor ka jingskhem ka jingkular ban nang kyntiew ïa ka jingïadei haba phai sha ka jingshngaiñ jong ka thaiñ,” la ong u nongaiktien ka tnad ïada ri na Guwahati, u Lieutenant Colonel Mehendra Rawat.
Hadien ka jingïalang, ka kynhun shipai ka India ka la pyni ïa ka jingtbit jong ka lyngba ka jingpyninam ïa ka rukom kilan met haba ïadei bad ki tiar siat bad kiwei-kiwei.
U Rawat u la ong ba kane ka prokram ka la kdew shai halor ka jingjam shaphrang ha ka liang ki kor ka juk stad teknoliji lyngba ka sienjam ‘Atmanirbhar Bharat’.
Ki shipai na baroh arliang ki la ïakren bad ïamir jingmut para ma ki bad ïasam ruh ïa la ki jingshem ha ka kam, ha kawei ka liang, kaba la nang pynkhlaiñ shuh-shuh ïa ka jingïadei kaba la mih na kane ka jingkilan met.
Ka jingïalang ka la poi sha kaba kut ha ryngkat ki jingkren kiba ban jur halor ka jingdonkam jong ka jingïatylli ha ka ban shimkhia ïa ki jingtynjuh ha kylleng ka pyrthei – kaba la ïalam sha ka jingkut kaba jop jong kane ka jingkilan met bad kaba pynbiang ïa ka nongrim na bynta kiba kum kine ki jait prokram hadien-habud hapoh ka jingbthah jong ka United Nations.
