Shillong, Naitung 16
Ka Federation of Khasi Jaiñtia and Garo People (FKJGP) ka la buh jingkylli ïa ka tnat pulit halor ka jingkhot hajir ïa u Chief Organising Secretary ka seng ba leit khynra ïa ki laisen bar jylla ha ka thaiñ Demseiñïong bad Polo dang shen.
Ki pulit jong ka thanat Rynjah ki la bthah ïa u Chief Organising Secretary ka FKJGP u Bah Khrawkupar Nongsiej ba u dei ban leit hajir hakhmat ki pulit ka Nongmensong Outpost hadien ba ka seng ka la pynlong ka jingkhynra laisen ïa ki dukan bar jylla dang shen.
Lah ban pynkynmaw ba ha kane ka jingkhynra laisen ba la pynlong da ka FKJGP, la ïadonlang ryngkat ki ophisar na ka Khasi Hills Autonomous District Council (KHADC), na ka tnat Labour bad na ka tnat Food & Safety jong ka Sorkar Jylla.
Haba kren sha ki lad pathai khubor haba leit synran lang ïa la u dkhot ka seng sha Nongmensong Outpost, u President ka FKJGP Sengkmie u Bah Dundee C Khongsit u la ong, “Ka FKJGP ka lyngngoh ba kumno ka tnat Pulit ka khot hajir tang ïa ki nongïalam ka Seng haba pynlong ïa katei ka jingkhynra, naba la ïadon lang ruh ki ophisar ka District Council, na ka tnat Labour, tnat Food & Safety.”
U Bah Dundee u la ong, ha kane ka jingkhynra haba la ïadon lang ki ophisar na kitei ki tnat, te balei pat ka tnat pulit ka khot hajir tang ïa u dkhot ka FKJGP? Haba ka ong ba ka dei ka jingleh beaiñ, balei kam khot hajir lang ïa ki ophisar?
Utei u nongïalam ka FKJGP u la ong, “Ngim sngew phylla ïa kane ka jingleh ki pulit bad ka Sorkar hynrei kaba sngew thamula ka long ba lada ngi pyrshang ban tehlakam ïa kata ka jingwan rung beaiñ ki bar jylla, pynban ka ïada bad pynsaja ïa ki dkhot seng da kane ka lynti.”
Kum ka seng kam don satia ka jingpyrshah ïa ki bar jylla ba kin wan bylla ha ki jingtrei kaba ki trai jylla kim pat lah ban trei ïa kita ki kam bad haba ki wan ruh ki dei ban wan da ka lynti jong ka aiñ, kata ban pynbiang ïa ki kot ki sla bad baroh ki jingdonkam, la ong u Bah Dundee.
U la ong ba ka Meghalaya ka la don ïa ka aiñ Inter-State Migrant Workmen Act, 1979 kaba la treikam naduh u snem 2011, kaba kren shai ruh ba ki nongbylla bar jylla ki hap ban ïoh ïa ka work permit ban wan bylla hapoh ka Jylla.
“Ka aiñ ka don ban tehlakam ïa ki nongbylla bar jylla khnang ba kin ym lah ban long kynrad ha kane ka ri jong ngi nalor ba kin nym lah ruh ban rung kyrteng ha ka electoral roll ban ïoh bynta ban jied nongmihkhmat. Kumta ka long kaba donkam ban ïada ïa ka pateng ban wan ha kine ki 10 bad 15 snem, naba lada ym lah, kan sa buh jingma pat,” la ong u Bah Dundee.
Shuh shuh une u nongïalam ka FKJGP u la ong ba kane kan nym dei ka jingkut hynrei nangne shakhmat la bthah ïa baroh ki shnat treikam ka seng naduh ki district, ki circle bad unit ba kin pynjur ka jingkhynra ïa ki laisen bylla jong ki bar jylla.
