Nongstoiñ, Naitung 16
Ka jingkhynra nongtrei bar jylla da ka Khasi Students’ Union (KSU) ka la nang ïai bteng bad ha ka Sngi Ba-ar, ka KSU West Khasi Hills District Unit ki la leit ban khynra ïa ki bar jylla kiba wan trei lyngba ka projek jong ka NHIDCL kaba dei ka surok Nongstoiñ-Rambrai-Kyrshai kaba la pyntrei ka da kompeni Spica.
Ïa katei ka jingkhynra ka KSU West Khasi Hills District Unit ka la leh ha ryngkat ka jingïatreilang bad ka KSU Rambrai Circle hapoh ka jingïalam jong u samla Wanbhakupar L Nonglait, Organising Secretary ka WKHD Unit bad u samla Pynbiangbor Basaiawmoit, Vice President ka KSU Rambrai Circle.
Ka khubor na ki nongïalam ka KSU, ka ïathuh ba ha kane ka jingleit khynra ka seng ka la ïoh ban bat haduh 26 ngut ki bar jylla kiba pynkheiñ ïa ka ‘Inter-state Migrant and Workmen Act, 1979’, ka seng ka la ïoh bat ruh kumba 6 ngut ki bar jylla ki bym lah ban pynshisha ba ki dei ki nong India.
Kumta ka seng kumba ka ju leh ka la shim ïa ka rai ban beh krad noh ïa baroh 26 ngut ki bar jylla sha ki jaka ba ki wan. Na ka liang ka seng ka la ai ruh ka jingmaham ïa ki kontraktor baroh ha ka thaiñ ba ki dei ban pynbiang ïa ka work permit haba ki wanrah nongtrei bar jylla ha ka thaiñ.
Shuh shuh ka kyrwoh na ka KSU West Khasi Hills District Unit sha ka sorkar bad ïa ki tnat treikam bapher bapher ka la pynpaw da kaba ong, “Lada phim nang ban shim ïa ka kamram ba la bynshet ha phi, ka seng kan leh ïa kaba donkam ban shim ïa ka kam na ka bynta ban im ka ri bad ka jaidbynriew.”
Ka KSU lyngba ki nongïalam ka la pynpaw ruh ba kan dang bteng ban khynra ïa ki bar jylla kiba wan trei beaiñ katba ka sorkar kam palat lah ban pynurlong ïa ki jingdawa jong ka seng, kata ïa ka ILP bad ban pyntreikam noh mardor ïa ka MRSSA.
