Shillong, Naitung 16
U nongñiah jong kawei ka kali u la mynsaw jur hadien ba kawei ka trok ka la rat nakhmat kaba la jia ha ka thaiñ Mukhla hajan jong ka jingkieng Tluhmulong ha West Jaiñtia Hills District.
Kane ka la jia ha ka Sngi Ba-ar ha ka por kumba 3:30 eiei janmiet hadien kawei trok kaba la wan na ka liang bym dei (wrong side) ka la leit ban tynrah beit-beit ïa ka Maruti Van kaba don ïa u nombor ML04-A-8136, kaba la ñiah da u Banrilang Ryndong na Moodymmai, katba dang thmu ban leit buh ïa ki synduk ko sha Mukhla.
Katkum ki briew ba la sakhi ïa kane ka jingjia, la ong ba kane ka trok ka la wan na ka liang bym dei (wrong side) jong ka surok bad ban rat ïa katei ka maruti van na ka bynta nakhmat bad mar ïa dep tynrah, kane ka trok ka la phet krad na kane ka jaka.
Ïa utei u nongñiah ba la mynsaw la pynkit noh sha ka CHC Ummulong na ka bynta ban pynïoh ka jingsumar. Ïa katei ka trok kaba la phet krad na katei ka jaka, kaba don ïa u nombor AS01-MC-0527 la ïoh ban bat noh da ki pulit na Ummulong.
