Shillong, Naitung 16
U MLA ka BJP na South Shillong konstitwensi u Bah Sanbor Shullai u la ong ba ki MLA ki long kum u kpa hapoh ka konstitwensi ban peit lem ïa kiba ïakynduh jingeh. U la buh jingkylli ruh ïa kito kiba ong ba ym ju don ban ïarap ïa ki briew hapoh ka konstitwensi namar baroh 60 ngut ki MLA ka Jylla ki ju ïoh ka pisa ban ïarap ha konstitwensi, kata, mar T. 10 lak shisnem lyngba ka Discretionary Grant (DG).
Haba kren sha ki lad pathai khubor ha ka Sngi Ba-ar ka 16 tarik Naitung 2024, u Bah Sanbor u la ong ba ka tulop jong ki MLA ka long 2 lak tyngka tam shibnai bad ma u, u ju nohsynñiang ruh hateng-hateng na ka tulop jong u ban ïarap ïa kito kiba mad jingeh hapoh ka konstitwensi ne kiwei pat kiba ju wad ïakynduh ïa u.
Hynrei u Bah Sanbor u la ong ba kaba u kham lah eh ban kyrshan ïa ki briew kiba shem jynjar bad kiba donkam jingïarap kyrkieh, ka dei lyngba ka DG kaba la mang khnang da ka Sorkar ïa baroh 60 ngut ki MLA kata T.10 lak shisnem.
Haba buh jingkylli ïa kito kiba pynpaw sha ki paidbah ba ki MLA kim lah ban ai jingïarap kum ka bai dawai bad kiwei ki jingkyrshan ïa kiba mad jingeh hapoh ka konstitwensi, u Bah Sanbor u la ong ba ki MLA kim lah satia ban ong ba kim lah ban ai jingïarap namar lyngba ka Discretionary Grant, uno-uno u MLA u lah ban ïarap ïa ki paidbah khamtam lei-lei ban ïarap shimet sha kito ki lanot haba jia ka jingjia kaba shu jia kyndit kum ka jingkhlad namar ka jingtakhuh kali bad kiwei ki jingjia kiba shu long kyndit-kynsan.
U la ong ba ka jingthmu jong ka Discretionary Grant ka dei na ka bynta baroh 60 ngut ban ïarap ïa kiba donkam jingïarap ha ka khia ka shon.
“Ngi ki MLA ngi long kum u kpa ban tynrong lem ïa kiba shem jingeh ha konstitwensi bad ngi lah ban ïarap ïa kiba donkam jingïarap namar ki MLA ki ïoh ka DG kaba mar T.10 lak shisnem,” u la ong.
Hynrei u Bah Sanbor u la ong ba lada don mano-mano na ki MLA ki bym kwah ban shim ïa ka pisa na kane ka Discretionary Grant, ki hap thoh sha Meghalaya Legislative Assembly ba kim kwah ban pyndonkam ïa ka pisa.
Shuh shuh u Bah Sanbor u la ong ba ka don ka jingtyrwa sha u Lamphang ka Ïingdorbar Thawaiñ ka Jylla ban pynkiew ïa ka Discretionary Grant na ka T.10 lak sha ka T.20 lak shisnem ïa uwei-uwei u MLA ka ban treikam naduh u snem 2025.
