Ngim pat ïoh pdiang aplikeshon, ngin ïakhun ïa ka ilekshon shiteng samoi: Hek

Kum ban shu kdew hangne ka Gambegre konstitwensi ka la sah thylli khlem nongmihkhmat hadien ba u MLA jong ka, u Saleng A. Sangma u la shah jied noh kum u MP ha ka ilekshon...

Shillong, Naitung 16

U Myntri ka Sorkar Jylla na ka BJP, Bah A.L. Hek u la ong ba ka seng kam pat ïoh pdiang ïa kano-kano ka aplikeshon na kito kiba don jingthmu ban ïa aïreng ha kane ka ilekshon shiteng samoi ban wan na Gambegre.

“Ngim pat rai eiei halor kane namar haduh mynta, ngim pat ïoh pdiang ïa ki aplikeshon. Ynda ngi la ïoh pdiang, hangta ngin sa lah ban peit thuh bad jied ïa u kyrtong uba kynsai tam,” la ong u Bah Hek haba kren sha ki lad pathai khubor.

U la pynkynmaw ruh ba ka seng dang shen ka la lum ïa ka jingïalang ha ryngkat ka jingdonlang u Myntri ka Sorkar Pdeng, u George Kurian.

Ha kajuh ka por, u la ïathuh ba mynta, ka seng ka la ïoh ïa u nongïalam bathymmai u ban khmih ïa ka BJP hapoh ka Jylla, u Anil Antony.

“Haba phai sha ka ilekshon shiteng samoi ha Gambegre, ngin ïakhun,” la pyntikna u Bah Hek.

Halor ka jingsngew skhem ka seng ha ka ilekshon shiteng samoi ban wan khamtam ka jingthmu jong ka NPP ban pynïeng da ka kurim jong u Myntri Rangbah nalor kiwei-kiwei ki seng saiñ pyrthei, u Myntri u la ong, “Ka ilekshon ka dei ka ilekshon bad barabor ka don beit hi ka jingïakhun, bad na bynta kano-kano ka jingïakhun kaba jwat, ngin hap ïakhun.”

U la ong ruh ba ka BJP ka dei ka seng heh ka ri bad haba ïadei bad ka jingïakhun ha ka ilekshon shiteng samoi, kane baroh kan shong katno ngut ki pan tiket, hynrei ïa mynta ka dang kloi palat ban ong eiei.

Halor ka jingnang kiew ka Congress ha Ri-lum Garo bad ka jingkyrmen ka seng ban jop ha kane ka ilekshon shiteng samoi, utei u nongïalam ka BJP u la ong, “Ngam don eiei ban ong na bynta kiwei pat ki seng saiñ pyrthei. Nga tip tang ïa ka BJP, halor ka BJP nga lah ban jubab, hynrei halor kiwei pat ki seng, ngan ym lah ban jubab.”

Kum ban shu kdew hangne ka Gambegre konstitwensi ka la sah thylli khlem nongmihkhmat hadien ba u MLA jong ka, u Saleng A. Sangma u la shah jied noh kum u MP ha ka ilekshon dang shen sha ka Lok Sabha.