Shillong, Naitung 16
Ar ngut ki samla kynthei na Umdihar kaba hap ha Ri Bhoi District ki la poi sha Delhi ban peit nuksa ïa ka rukom pynïaid ïew ïa u sohtrun bad kiwei kiwei jait soh kiba ju rep ha Meghalaya.
Kine ar ngut ki samla kynthei ki long ka Kong Badashisha Lapang bad Kong D. Shylla kiba buh ïa kawei ka jaka ha Umdihar ban lum ïa u sohtrun na ki nongrep ha Ri Bhoi District.
Ha ka jingïakynduh bad U Nongsaiñ Hima ha nongbah Delhi ha ka por ba ki wan jurip ïa ka ïew sohtrun ha Dilli Haat kaba la long mynshem taïew, ki la ïathuh ba mynshem snem ki thied 12 tyngka haduh 15 tyngka shi kilo u sohtrun na ki nongrep hynrei mynta u snem ki la thied 15 tyngka haduh 16 tyngka shi kilo.
Ki la ïathuh ba ïa u sohtrun ba ki thied na ki nongrep ki la die sha Bangalore bad ki la phah rah ruh 10 tylli ki sohtrun sha Vietnam ba kin mad hynrei haduh mynta kim pat ai jubab.
Nalor kine ki samla kynthei, U Nongsaiñ Hima u la ïoh ruh ban ïakren bad ki nongrep kiba wan na kiwei ki district na Meghalaya kiba la wan jurip ïa ka ïew sohtrun bad kiwei kiwei ki mar rep khnang ba ki lah ban pynïaid ïew ïa u soh na Meghalaya.
Kine ki nongrep kiba rep da kiwei kiwei ki mar rep ki la ïathuh ba la jied ïa ki ban wan twad jingmut ïa ka rukom pynïaid ïew ïa u sohtrun, ki la wan ban peit ruh ïa kiwei ki mar rep kiba la die ha Delhi.
Uwei u nongrep u la ong lada u sohtrun u ïaid ïew sha Delhi un sdang ban rep sohtrun noh khnang ban lah pynïaid ïew shabar ka jylla.
