Jowai, Naitung 16
Ki nongïalam ka Dorbar ki Waheh Kur Ri Jaiñtia (DWKRJ) ha ka 16 tarik Naitung ki la ïakynduh ïa u Deputy Commissioner ka West Jaiñtia Hills District u Bah BS Sohliya ban aiti ïa ka shithi ha kaba ïadei bad ka syrnot Scheduled Tribe sha ki paidbah.
Katkum ka shithi ba la aiti ha u DC, ka Dorbar ki Waheh Kur Ri Jaiñtia ka la ong ba ha ka 8 tarik Jylliew ka la shim ïa ka rai ba ki nongaplai Scheduled Tribe Certificate na ka bynta ka “Jaiñtia/Pnar” ki donkam ban ïoh shwa ïa ka Clan Certificate kaba soi da ki Waheh kur.
Nalorkata la kyrpad ruh ba ïa ka Scheduled Tribe Certificate ïa ki Jaiñtia/Pnar dei ban ai tang sha ki briew kiba shim jait na ka kmie bad kane kan ïarap shibun ha ka ban khanglad ïa ka jingpyndonkam bakla ïa ka Schedule Tribe Certificate.
Ki Waheh Kur ki la kyrpad ruh ïa u DC ban kyntait ïa baroh ki aplikeshon jong ki ‘riew shimet kiba shim ïa ka jait jong ka kmie-rad ne ka kmie jong u kpa namar kane ka long pyrshah ïa ka longbriew-manbriew jong ka jaidbynriew kaba shim jait na ka kmie.
Na ka liang u Deputy Commissioner u la kular ban ïatreilang halor kane ka jingkyrpad jong ka Dorbar ki Waheh Kur Ri Jaiñtia.
Ha kane ka jingleit ïakynduh la ïalam da u President Dorbar ki Waheh Kur Ri Jaiñtia u Khroo L Pariat, Vice President u Pyrkhat Shylla, u D Donstan Khonglah bad u G Bareh Assistant General Secretary nalor kiwei kiwei ki dkhot.
