Shillong, Naitung 17
U Symbud Myntri Rangbah ka Jylla, u Bah Sniawbhalang Dhar, uba khmih ruh ïa ka tnat Pynroi Sor (Urban Affairs) bad kiwei, u la kyntu ïa ki seng bapher bapher ban ïatreilang bad ka Sorkar.
U Bah Sniawbhalang u la ong ba ka jingkhynra ha kine ki sngi bad taïew ïa ki nongbylla bar jylla ka la ktah shibun ïa ki kam kiba dei ban pyndep la ka long ïa ki projek jong ka Sorkar lane ki projek jong ki riew shimet.
U la pyntip ruh ba shen ka Sorkar kan sa khot ïakren ïa ki kynhun bad nongïalam jong ki seng kiba pynlong ïa ka jingkhynra ïa ki nongbylla bar jylla.
Shuh shuh u Bah Sniawbhalang u la pyntip ruh ba ïa ki kam bylla kiba bun hi la ai trei beit da ki trai jylla, hynrei don ruh katto katne ki kam bad projek ïa kiba hap ban phah trei ïa ki briew kiba na shabar.
Shuh shuh haba kyntu ban ai ka jingïatreilang, u Bah Sniawbhalang u la ong ba lehse ki lah ban don ki jingduna hangne hangtai, hynrei u la ong ba dei ban ïapynbeit.
Ha kawei pat ka liang haba kylli, u Symbud Myntri Rangbah u la ong ba u la ïoh jingtip ba u Myntri Rangbah ka jylla u Conrad K Sangma dalade un sa khot ïakren ïa ki seng, bad ong ruh ba ka jingkhang jong ka Sorkar ka plie na ka bynta ka jingïakren.
Lah ban pynkynmaw ba ki seng bapher bapher khamtam ka KSU ha kine ki sngi bad taïew ka la pynjur ïa ka jingkhynra ïa ki nongtrei bar jylla bad ban pynphai noh sha ki shnong na kaba ki wan, ïa kito ki bym biang ki kot ki sla. Nalor kane, la sakhi ruh ba ki la pynïeng da ki khyrdop ha ki bynta bapher bapher ban talasi ïa ki kot ki sla jong ki briew ba wan nabar. Shuh shuh la sakhi ba wat na ka liang jong ki pulit ruh ki la dep ban khot hajir ïa kiba bun ki nongïalam ka KSU, FKJGP bad kiwei ki seng.
