Nongpoh, Naitung 17
Ki pulit pynïaid kali jong ka Nongpoh ha ka Sngi Balang ki la pynlong ïa ka jingkhynra ïa ki kali kamai Autorickshaw bad ruh ïa ki ar shaka ha ki bynta jong ka surok bah National Highway 6 marjan bad ka Bethany Hospital hadien ka jingïoh jingujor na ki nongïalam ka seng ki nongñiah Autorickshaw ka thaiñ Nongpoh kata ka Nongpoh Region Auto Owners’ and Drivers’ Association (NRAODA) Nongpoh Unit.
Ha kane ka jingkhynra, ki pulit ki la lap ba bun na ki nongñiah ki dei ki bym don ïa ki laisen bad ki kot ki sla kiba biang nalor ki nongñiah ar shaka ki bym deng ïa ki jingda khlieh lane helmet bad ruh ki don kiba ñiah kali kiba dang hapoh 18 snem ka rta.
Haba kren sha ki lad pathai khubor, u Bah F Lyngdoh u la ong, ka seng kam banse ban shim ïa kane ka bynta ban ïatreilang ryngkat bad ki pulit halor kane ka bynta, hadien ba kum ki nongïalam, ki ïoh ïa bun ki jingujor na ki paidbah nongleit nongwan pyrshah ïa ki nongñiah kiba kamai da ki Autorickshaw.
U Bah Lyngdoh u la ïathuh ruh ba ki la ïohi na ka por sha ka por ba dei halor ka jingdon jong ki nongñiah Autorickshaw kiba la shoh khawiang, ka jingñiah khlem akor, ka jingñiah da kiba dang rit ka rta bad ruh kaba kham sngewtriem ka dei halor ka jingujor halor ka jingdon jong ki nongñiah kali kiba donkti ruh wat ha ki kam rahbor.
U la ïathuh ruh ba ka jingshim ïa kane ka sienjam ka dei hadien ba ki nongïalam ka Sengkmie jong ka NRAODA kim shym la shimkhia satia ïa kane ka bynta mynta da ki bun tylli ki snem da kaba kynnoh ruh ba ki ïoh thiah lyngngai ban peit ïa ka jingeh bad ka bha ka miat jong ki nongñiah kali kamai autorickshaw.
Utei u nongïalam ka NRAODA Nongpoh Unit u la ong ruh ba ka jingthmu hi kam dei satia ban wanrah jingïashun ne jingïasniew para nongñiah kali kamai, hynrei ban wanrah ïa ka jingshngaiñ ïa ki paidbah nongleit nongwan bad ruh ban don ka jingïadei kaba biang para nongñiah da kaba bud ryntih ïa ki kyndon aiñ.
Katba u Bah JK Phawa, uba dei u Sub-Inspector jong ki pulit pynïaid kali ka thanad Nongpoh, u la ong ba kane ka jingkhynra ka dei ruh kum shi bynta ka jingpynshai paidbah halor ka jingdonkam ban don ïa ki laisen bad ki kot ki sla kiba biang haba ñiah ïa ki kali bad ruh ban deng ïa ki jingda khlieh haba ñiah ïa ki ar shaka namar bunsien ka jingbym bud ryntih ïa kine ki kyndon jong ka sorkar, ka ïalam sha ka jingsniew bad ki jingjia ba sngewsih.
Utei u ophisar u la ïathuh ruh ba ha kane ka sngi, la lap ïa bun ngut ki nongñiah kiba kamai da ki Autorickshaw ki bym don satia ïa ki laisen bad ki kot ki sla kiba biang nalor ki nongñiah ar shaka ruh, ki bym deng ïa ki helmet ha kaba na ka liang jong ki pulit pynïaid kali, ki la hap ban daiñ kuna ïa ki kum ka jingsneng ba kim dei shuh ban bakla nangne shakhmat.
