Don lang ki ‘Angel’ & ki ‘Ksuid’ ha ki seng; ki shim kabu lyngba ka jingdon hapoh ki seng: Lawai

Kata ka dei ka jingshisha la ka long ha ka balang, ka shnong ne hapoh ka sorkar ne ha bynta bapher-bapher ki don ki angel bad ki ksuid," la ong u Bah Lawai.

Shillong, Jylliew 17

Uwei na ki nongseng jong ka Hynñiewtrep Youth’s Council (HYC) bad uba dei ruh u President barim, u Bah Peter J. Lawai, ha ka Sngi Balang u la ong ba ym baroh kiba don ha ki seng ki dei kiba bha, hynrei ki don ruh kiba sniew bad kata ka jingdon jong kita kiba bha bad ki basniew ka long ha ki balang, ki shnong, ka sorkar ne ha ki bynta bapher-bapher ruh kumjuh.

“Ki bun ki paidbah ki sngewthuh bakla bad pyrkhat bakla ha kane ka por bad ka juk kaba mynta. Hooid, ngam lah ban ong ba ka jingdon jong ki sengbhalang baroh ki long ki Angel hynrei ki don ruh kiba dei ki ksuid bad ki don ruh kiba dei ki Angel. Kata ka dei ka jingshisha la ka long ha ka balang, ka shnong ne hapoh ka sorkar ne ha bynta bapher-bapher ki don ki angel bad ki ksuid,” la ong u Bah Lawai.

Haba ai jingkren ha ka jingrakhe dap 10 snem ka jingïaid lynti jong ka seng HYC kaba la pynlong hapoh ka Hall jong ka Lariti kaba don ha Mawdiangdiang, u Bah Lawai u la ong ba ki don ki paidbah kiba ju ong ba ki briew, namar ba kim donkam-donjam, ki la rung sha ki seng ban kamai spah bad halor kane u la ong ba um lah ban len eiei halor kata namar ki ju don ki seng kiba shim kabu ba lyngba ka jingdon jong ki hapoh ki seng, ki lah ban leh ïa ki kam leh bor, thombor bad ki kam be-aiñ bapher-bapher.

Shuh shuh u Bah Lawai u la ong ba ka jingmih jong u shakhmat ban rung hapoh ka seng ka long ban mih bad ai jingïarap ïa kito ki briew kiba don hapdeng ki jingjynjar bad ki jingeh hapoh ka imlang-sahlang ym ban kamai spah ne ban thombor.