New Delhi, Naitung 17
Ka Shaikha Mahra Bint Mohammed Bin Rashid Al Maktoum, ka khun jong u Nongsynshar ka Dubai, ka la pynbna paidbah lyngba ka ‘Instagram’ ba ka la ïa pyllait san shyieng na u kurim jong ka, u Sheikh Mana Bin Mohammed Bin Rashid bin Mana Al Maktoum.
Kane ka jingpynbna ka la wan hadien palat ar bnai ba kine ki arngut ki la ïoh ïa i khun banyngkong.
Ha ka jingthoh da ka ktien English, ka Shaikha ka la ong, “Dear Husband, As you are occupied with other companions, I hereby declare our divorce. I divorce you, I divorce you, and I divorce you. Take care. Your ex-wife.” (Namar ba phi la bunkam bad kiwei ki paralok, nga pynbna ba ngi la ïa pyllait san shyieng. Nga la pyllait san shyieng, nga la pyllait san shyieng, bad nga la pyllait san shyieng. Sa peit bha ïalade. Na ka kurim bamynshwa.)
Ki la don bun bah ki nongkynthoh halor kane ka jingpynbna. Don kiba la pynpaw ba lehse ki la don kiba pyndonkam bakla ïa ka Instagram jong ka Shaikha. Hynrei don ruh kiba la ai khublei ïa ka ba ka la shim ïa katei ka sienjam kaba pyni ïa ka jinglong shlur ka jong ka.
Kitei ki shijur ki la ïathoh shongkurim ha u bnai Jymmang jong u snem ba la lah, bad ki la ïoh ïa I khun kynthei hadien 12 bnai.
Ka Shaikha Mahra ka dei ka khun jong u Vice President bad Myntri Rangbahduh jong ka United Arab Emirates bad Nongsynshar ka Dubai.
Katei ka longkmie ka la ju mih shakhmat ban kren halor ka jingdonkam ban aibor ïa ki kynthei bad ïa ki nongsaiñdur kiba dei na UAE. Ka Shaikha ka la pyndep ïa ka jingpule ha ka International Relations na kawei ka skulbah kaba don ha United Kingdom, bad ka la pule ruh ha Mohammed bin Rashid Government Administration.
