Shillong, Naitung 17
Ki nongïalam ka Voice of the People Party (VPP) hapoh ka jingïalam u President, Bah Ardent M. Basaïawmoit ha ka Sngi Balang ki la leit ban jurip ïa ka jaka kaba don ha ka shnong Mawshun, East Khasi Hills, hadien ka jingud jingnam jong ki nongïalam shnong halor ka jingkynnoh bym sngap jong ka Sorkar ïa ka jingdawa ka shnong – kata ban pynïaid ïa ka surok By-Pass na ka surok kaba la don lypa.
Kane ka surok By-Pass ka dei shi bynta jong ka projek surok na Shillong sha Tamabil kaba la pyntrei da ka National High-ways Infrastructure Dev-elopment Corporation Limited (NHIDCL).
Na ka liang ki nongshnong shnong ki la pynpaw ba kim kwah satia ba kane ka surok kan ïaid lyngba na ka jaka ba la thew da ka NHIDCL bad ka Sorkar Jylla namar kan ktah ïa kumba 7 tylli ki tyllong um kiba don hapoh ka thaiñ.
Kumban shu kdew hangne, ka Dorbar Shnong Mawshun ha ka taïew ba la dep, ka la mih paidbah kum ka dak ban pynpaw ka jingpyrshah ha ryngkat ka jingdawa ban pynïaid noh na kawei ka jaka ïa katei ka surok By-Pass kaba 3 km.
“Ïa kane ka kam kumba nga la pynpaw naduh u snem 2016, ka la don ka jingpyntip bad ka jingïalang hapdeng ki nongïalam jong ki shnong na ki thaiñ ki dong jong ngi ha Wahkdiat. Katkum ka jingpyntip na ka liang jong ki, ki ong ba ka Mawshun kam don ka By-pass, kaba mut, kan leit beit na ka surok kaba la don lypa lait noh katto-katne ki shnong – ka shnong kaba don harum kaba don ha ka thup jong ka By-Pass. Ngi, ngi ap ïa ka jingpyntip lano kin wan ban peit bad ban thew,” ong u Assistant Rangbah Shnong ka Mawshun, Bah Pyndap Tongper.
Ha kawei ka liang, u la pynpaw ka jinglyngngoh ba ha u snem 2017, la ïoh jingtip ba la wan ban ‘Survey’ ïa ki bynta jong ka khlaw da ka jingthmu ban shna ïa katei ka By-Pass.
U la ong ba mar kumta, na ka liang ka shnong khlem shongthait, ka la thoh sha ophis Deputy Commissioner bad ïakynduh ruh ïa u MLA ka thaiñ.
“Ngi la leit ban ïakynduh bad ïakren bad ong ba ngim pdiang ïa kane bad ngim kwah ba kan leit na katei ka jaka ba la pynkhreh da ka Sorkar ba wan ka ‘Survey’, halor ka nongrim jong ki tyllong wah, ki tyllong um kiba bun,” u la ong.
U Bah Tongper u la ong ruh ba ka shnong ka la ai jingmut ïa ka Sorkar ba kan bha shi kat dei ba ka By-Pass kan wan beit na ka surok kaba la don lypa.
“Da ka ïaid lyngba ka surok kaba la don lypa, kan ktah tang khyndiat eh – namar tang kane ruh ka la heh lypa ka jaka bad kin shim sa tang khyndiat na ka kper jongno-re-jongno bad ngim sngew eiei…ngin ai beit,” u la ong.
Halor ka jingshah kam trai jong katto-katne ki jaka ha kiwei pat ki briew, u Bah Tongper u la ong, “Ngi la kdew shai ba kane ka jaka ka dei jong iwei na ki nongshong shnong jong ngi bad ym dei ban ai sha kawei pat ka kyrteng namar ha ka thup, la paw da kawei ka kyrteng.”
Shuh shuh u la bynrap ba watla ki nongshong shnong, nongïalam shnong, bad ka Raid ki la pynshisha ba ka dei jong ita i Kong, phewse, ka ophis ka DC bad kompeni kim pdiang ïa kane bad ka ophis DC ka la pyllait ïa ka bai lutksan sha kita ki briew ki bym dei hok ki trai jaka.
“Na ka liang ka shnong bad ka Raid, ka khlem ai kano-kano ka kot jingpynshisha khyndew ïa kine ki briew kiba la ïoh ïa ka bai lut ksan. Ngam tip mano ba donkti hangne ban ai ïa ki kot jingpynshisha, nga tharai ka Sorkar kan tip kham bha,” u la ong.
