Mairang, Naitung 17
U Myntri ka tnat Arts and Culture ka Sorkar Jylla, u Bah Paul Lyngdoh, ha ka Sngi Balang u la ïoh ban plie paidbah ïa ka Museum and Cultural Centre of Indigenous Knowledge kaba don ha ka shnong Nongkhlaw ha Eastern West Khasi Hills.
Kane ka sngi ka dei ruh ka sngi kynmaw burom ïa ka lyngkhuh sngi ïap kaba 189 u Syiem Tirot Sing Syiemlieh uba dei u Syiem ka Hima Nongkhlaw.
U Bah Paul haba kren ha ka jingïalang plie ïa ka Museum, u la ai khublei ïa ki ophisar ka tnat Arts and Culture kiba la shimkhia ban pynurlong ïa ka jingplie ïa ka Museum ha ka lyngkhuh sngi ïap ba 189 jong u Tirot Sing.
U kongsan u la ong ruh ba ka nam u Tirot Sing ka la suh sieng ym tang ha kane ka ri hynrei wat shaduh bar jong ka Ri ruh kumjuh.
U la kyntu ïa ki paidbah ba kin don ryngkat lang ban pynlong ïa kane ka Museum ym tang ba kan don ïa ki nongjngoh hynrei wat ïa ki nongwad bniah.
Haba kren pat ha ka jingïalang kynmaw burom ïa ka lyngkhuh sngi ïap u Syiem Tirot Sing ba la pynlong ha madan Nongrah jong ka shnong Nongkhlaw, u Bah Paul u la pynpaw ba ka jingpyndonburom ïa ki riewkhraw kum u Tirot Sing, ka dei ym ban kynmaw ïa kaba la dep bad kan kut hangta, hynrei ka jingthmu long ban peit ïa kaba mynta bad ka lawei ba kumno ba kin shim nuksa na ka jingim kiba la ïaid ha shwa.
U la ong ruh ba ki don ar tylli ki sngi kiba donkam duh ha ka jingim u briew, “Kawei ban kynmaw ïa ka sngi kha bad kaba kham kongsan ka long ban rakhe ïa ka sngi ba balei la kha ïa ngi ha kaba bun na ngi, ngi tip ïa ka sngi kha bad khyndiat kiba tip ba balei la kha ïa ngi bad kiba donbok ki tip ba balei la kha ïa ki.”
Shuh shuh u la ong ba ka jingim jong u Tirot Sing kaba ka sorkar Meghalaya ka sngew donbok ba ka la lah ban pynlong ïa u ym tang u riewshlur jong ka ri Khasi, hynrei u ‘riewshlur ïa uba ka pyrthei ka pule ka tip ïa ka jingim lyngba ki kam kaba ka sorkar ka la dep ban leh.
Ha kane ka sngi hashwa ban leit plie ïa ka Museum, u kongsan u la hiar ruh ha Mairang ban ïashim bynta lang ha ka ban leit buh syntiew ha u mot dur jong u Tirot Sing uba don ha ka shnong Mission Mairang.
