Shillong, Naitung 17
Ka Dorbar Shnong (DS) jong ka Mawlai Mawroh ryngkat ki nongshong shnong da kawei ka sur ki la pynpaw ïa ka jingpyrshah jur ban pynngat noh ïa ka shnong Mawroh shapoh ka MDC Jaïaw Constituency.
Kane ka sur jingpyrshah ka la mih ha ka jingïalang paidbah kaba la pynlong da ka Dorbar Shnong ha ka Sngi Balang na ka bynta ban ïakren halor ka jingai jingmut jong ka Delimitation Committee ban pynïasoh noh ïa ka shnong Mawlai Mawroh sha ka Jaïaw Constituency.
Ha kane ka jingïalang ki paidbah nongshong shnong jong ka Mawlai Mawroh da kawei ka sur ki la pynpaw ba kim kwah ban leit ban pynïasoh bad ka Jaïaw hynrei ki thrang ban don beit bad ka Mawlai Constituency.
Haba ïakren bad u Rangbah Shnong ka Mawlai Mawroh u Bah Harbor Lyngdoh Nongpyiur hadien ba la wai ka jingïalang u la ong, ka Dorbar Shnong ka pyrshah jur ïa kane ka jingai jingmut jong ka Delimitation Committee bad ki paidbah nongshong shnong ki thrang ban ïaineh beit hapoh ka Mawlai Constituency.
U Bah Harbor u la ong ruh ba lada phiah bad weng noh ïa ka Mawlai Mawroh ka long kumba kdiah ïa iwei i shympriah kti. U la ong ba kum ka dorbar shnong kam pdiang satia ïa kane bad u la ai jingmut ba kan bha ban phiah ïa ka Mawlai ha ki ar bynta lada ka la heh haduh katta katta, ban phiah da ka Mawlai A bad Mawlai B.
Haba kylli, u Bah Harbor u la ong ba kum ki nongïalam shnong kim shym la ïoh jingtip satia halor kane ban pynhap noh ïa ka Mawroh sha Jaïaw Constituency bad ki la ïohi ïa kane lyngba ka YouTube bad kotkhubor.
U la pyntip ruh ba ka Dorbar Shnong Mawroh ka la shim ïa ka rai ba kin aiti da ka dorkhas sha u Chairman jong ka Select Committee na ka bynta ban pynpaw ba kim kwah satia ban leit pynïasoh sha ka Jaïaw Constituency.
Ki la byrngem ruh ba lada na ka liang ki bor ba dei khmih kim shimkhia halor kane bad ki ïaid lait, kin sangeh wat ban ïashim bynta ha ka jingthep vote ha ka ilekshon MDC.
Ka la don ruh ka jingpynpaw ba lada rah noh ïa ka shnong Mawroh sha Jaïaw Constituency, kin sa hap noh ha ka Municipal Area, ïa kaba kum ki nongshong shnong kin ym lah satia ban pdiang bad ha kaba wat ïa ki skhim bapher bapher kiba ju wan hapoh ka shnong ruh, lah ban duh noh lada la kynthup sha Jaïaw Constituency.
