New Delhi, Naitung 17
U Myntri Rangbah ka Jylla, u Conrad K. Sangma, u la leit jngoh ïa ka Rashtrapati Bhavan ha ryngkat ki nongrep bad nongseng kam lajong jong ka Jylla kiba la ïashim bynta ha ka kylla ba-ar jong ka ‘Meghalaya Pineapple Festival, 2024’, kaba la long ha Dilli Haat, New Delhi.
Kane ka jingleit jngoh ka kdew shai ïa ka jingminot jong ka Sorkar ban pynneh-pynsah bad kyntiew ïa ka bha ka miat jong u budlum ka ïoh ka kot ka Jylla – ki nongrep.
Na ka liang u Myntri Rangbah u la ong, “Ka Sorkar Jylla barabor ka ïatreilang bad ki nongrep, kiba long u budlum jong ka ïoh ka kot ka Jylla. Kane ka jingwan jngoh hadien ka jingjop jong ka ‘Meghalaya Pineapple Festival, 2024’, ym tang ba ka ithuh ïa ka jingtrei shitom jong ki hynrei ka ai mynsiem ruh ïa ki ban kiew sha ki kyrdan bathymmai.”
Ha kajuh ka por, u Sangma u la kren shaphang ka mat halor ka ‘National Integration’, bad ban jur ba ka jingdon jong ki nongrep ka Jylla ha Rashtrapati Bhavan ka long ka jingsarong, kaba kdew ïa ka bynta halor ka ‘National Integration’.
Shuh shuh ki nongrep ka Jylla ki la leit jngoh ïa ka ‘Janjatiya Darpan’, ka kamra pyni nam haba ïadei bad ka lariti ha Rashtrapati Bhawan, ïa kaba la plie da ka President ka India, ka Droupadi Murmu, kaba ma ka ïalade ruh ka dei ka ‘riewlum. Ki nongwan jngoh ki la kmen shi kat dei ban ïohi ïa ki jingdeng ba la pynwandur na ki Ri-lum Khasi bad Garo kiba buh ha katei ka jaka.
Kane ka jingleit jngoh ïa ka Rashtrapati Bhavan kumta ka la pyni ïa ka jingïai trei shitom jong ka Sorkar Jylla ha ka ba pynkup bor ïa ki briew ha ki kyrdan jong ki shnong ki thaw bad ban wad ïa ki lynti thymmai na bynta ka ïoh ka kot.
