Shillong, Naitung 17
U President ka Khasi Students’ Union (KSU) u samla Lambokstarwell Marngar u la ong ba ka seng ka la lah ban phah ïa ki 2,500 ngut ki bar jylla ba kin leit phai biang sha ki jaka ba ki sah hadien ba ka sorkar jylla kam shym la lah ban pyntreikam ïa ka aiñ ban ïada ïa ka jingrung kyrthep ki bar jylla.
Ïa kane u la pynpaw haba ai jingkren haba leit buh syntiew ha u mot U Tirot Sing ban kynmaw burom ïa ka lyngkhuh sngi ïap kaba 189 snem kaba la long ha ka Sngi Balang ha madan Ïew-rynghep, Laitumkhrah.
U samla Lambok u la ong ba kine ki 2,500 ngut ki nongtrei kiba la wan na kiwei ki jylla kim shym la lah ban pyni ïa ki kot ki sla kiba biang haba wan ban trei hapoh ka jylla.
U la pyntip ruh ba kane ka jingkhynra mynder ka long shi namar ka sorkar jylla kam pat shym la lah ban pyntreikam ïa ka Meghalaya Residents Safety and Security Act, (MRSSA) 2016.
Shuh shuh u President ka KSU u la ong ba ki paidbah ki la phah ïa ki nongmihkhmat kiba deng tai, kiba tah ïit ïong bad pynpah ‘siren’ wat hapdeng ka jingdheng kali ha Shillong, hynrei kim lah ban thaw ki aiñ. U la ong ba ki sengbhalang kim don kali lait saw, hynrei kin pynpah ‘siren’ da ki kam ban im ka jaitbynriew.
U la ong ba ka seng kam don eiei ban tyrwa sha ka jaitbynriew, hynrei ki don tang syep ka snam bad ka jingim da kaba lah ban len lade ïa ka jaitbynriew.
U la ban biang ba ai kin shah kynnoh ha kane ka pateng da kiba bun rukom hynrei um kwah ba ki pateng ban wan kin kynnoh ïa ki samla ba mynta ba ki khlem leh eiei.
Ha kane sngi la wan pynshngaiñ lang da ki nongïalam ka seng FKJGP, HNYF, HITO, JSU, HANM, ki nonghikai bad ki tyngshop bad puron ka phlim ‘Dhaka Escape’.
Na ka liang u General Secretary ka KSU, u samla Donald Thabah, u la phla ba u Symbud Myntri Rangbah ka jylla, u Bah Sniawbhalang Dhar u la phone ïa u ha kaba ïadei bad ka jingkhynra mynder ka seng ha kine ki sngi.
U samla Donald u la ong ba ka KSU ha kine ki khyndiat sngi ka la pynïeng hi ïa ki khyrdop ban khynra mynder ha Ri-Bhoi, Rilum Jaiñtia, West Khasi Hills, South West Khasi Hills ban tehlakam ïa ka jingrung kyrthep ki mynder ri.
U la ïathuh ba ha kata ka jingïakren, u Bah Sniawbhalang u la ong ba kam dei ka kamram ka seng KSU ban khynra, bad ka dei ka kamram jong ka sorkar, hynrei u la jubab haba ka sorkar kam leh ka seng kan leh hi.
Shuh shuh u la pyntip ba wat u MP uba shu sieh ha Parliament u Rakesh Sinha u la ïakren halor kane ka jingkhynra mynder bad haba u la batai ba une u MP ruh u la kular ban ïakren sha Delhi ïa ka mat jong ka Inner Line Permit bad ka ktien Khasi.
U Bah Donbok Dkhar uba dei u President ka seng Hynñiewtrep Integrated Territorial Organisation (HITO) u la ong ba watla ka sorkar ka la pyntyrha ïa ki seng tang namar ki khynra mynder, hynrei kim don suloi ban ïakhun pyrshah tang tang kawei ka shympriah kti ban jied ïa ki nongmihkhmat.
Ha kane ka sngi la ïoh jingkren na u President ka seng FKJGP, u Bah Dundee Khongsit, u President ka HNYF, u Bah Sadon Blah, u President ka JSU, u Bah Jersom Shylla bad u tyngshop ka phlim Dhaka Escape Phira Dohtdong kaba dei ka phlim Khasi ka ban sa mih noh shen ha Bijou Cinema.
