Nongpoh, Naitung 17
Katba baroh kawei ka jylla ha ka Sngi Balang ka dang rakhe ïa ka lyngkhuh sngi ïap ba 189 jong u Syiem ka Hima Nongkhlaw u Tirot Sing Syiem, hynrei la kynnoh ba ka Meghalaya Marwet Archery Association (MMAA) kam shym la kheiñ snep bad burom da kaba pynïaid beit shakhmat ïa ka kam thoh tim ha Khanapara bad wat ban ong ba kim ithuh ïa uta u Tirot Sing.
Lah ban kdew hangne ba ïa kane ka sngi rakhe ïa ka lyngkhuh sngi ïap u Tirot Sing, wat ka sorkar jylla ruh ka la burom da kaba pynbna da ka shuti ha baroh kawei ka jylla kum ka dak ka jingburom bad wat na ka liang ki nongpynïaid ïa ka kam thoh tim ruh ki khang kdam ïa ka kam ban pynpaw ïa ka jingleh burom ïa une u riewkhraw.
Ïa kane ka jingkren heh bad ka jingleh bym suidñiew jong ka MMAA la lap da ki nongïalam jong ka FKJGP ha ka por ba ki la leit ban pynsangeh ïa ka jingïasiat khnam kaba don ha Khanapara Them Marwet.
Ha ka jingleit jong ka seng kaba la lamkhmat da u Publicity Secretary ka FKJGP North Khasi Hills District u Bah Ricky Majaw, la synran lang da ki nongïalam ka 9 Mile Baridua kiba kynthup ïa u Bah Rink Sohpdang, President, u Bah R Sohpdang lem bad kiwei kiwei ki dkhot.
Hynrei la ong ba ynda la poi ha katei ka jaka siat khnam thoh tim jong ka Khanapara, ki nongïalam ka seng kim shym la lap satia ïa ka kynhun kiba pynïaid ïa ka MMAA bad haba la pyrshang ban phone sha ki nongïalam ka MMAA la kynnoh ba u la kren heh da kaba ong ba kim kheiñ ïa kata ka sngi da kaba ong ruh kim ithuh ïa uta u Tirot Sing. Kane ka la pynbitar ïa ki nongïalam ka seng kiba la thmu syndon ban pynpra bad ban khang lut noh ïa ki dukan thoh tim baroh. Hynrei da ka jingkyrpad jong kito kiba shong dukan ban ailad ïa ki namar ki la dep die naduh mynstep bad shaei kin leit pynphai shuh ïa ka pisa ba bun jong ki briew, bad kumta ka seng ka sa sangeh noh.
Haba kren sha ki lad pathai khubor, u Bah Ricky Majaw u la ong, ka jingkren jong u Bah Will Sohpdang uba dei uwei na ki nongpynïaid ïa ka Meghalaya Marwet Archery Association ka la pynbitar bha ïa u namar ka jingkren lap lah jong u ba um ithuh ïa uta u Tirot Sing ka ktah shisha bad ka pynpaw ruh ba ma u kum u Khasi ba shong ba sah ha khappud um kheiñ shuh ïalade ba u dei u Khasi, bad um don hok ban wan ïasiat khnam ha Meghalaya, bad u lah ban leit sha Assam.
Une u nongïalam ka FKJGP u la ong ba na ka liang jong ka seng ka la buh da ka jingkylli hakhmat ka KHADC bad ka Sorkar Jylla ba hato kim lah ban leh eiei halor kane, bad lada kim lah, na ka liang ka seng kan leh da kaba tyngeh namar ïa ka sngi khraw jong ka jylla um suidñiew, hynrei ha ka por ba don ki jingleh niam da kiwei pat, kine ki briew ki ju khang ïa ka jingïasiat khnam.
U la ong ba na ka liang ka seng nangne shakhmat ka buh da ka jingmana ba lada ki dang ïa pynkheiñ, ka seng ruh kan ym don jingmap shuh.
