Shillong Naitung 17
Ka kynhun tohkit Enforcement Directorate (ED) ka la teh la khum ïa ki jingdon jingem jong ka M/s CMJ University, Shillong, Meghalaya, u Chandra Mohan Jha, ki bahaïing bahasem bad kiwei pat halor ka jingkynnoh ba la kane ka skulbah ka la ai ïa ki syrnot kyrdan pule kiba thok sha ki hajar ngut ki samla pule.
Ka jingteh jingkhum ka ED ïa ki jingdon jingem kane ka skulbah kiba shongdor kumba T.7.56 klur la pynngat hapoh ki kyndon aiñ Prevention of Money Laundering Act (PMLA), 2002.
Kine ki jingdon jingem ki kynthup ruh ha ka dur jong ki jingkynshew pisa ha ki Bank, Fixed Deposits, Insurance Policies bad jaka puta (landed property).
Ka ED ka la tohkit katkum ka ejahar bad Charge-Sheet kaba la mudui da ka tnat CID Meghalaya hapoh ki kyndon bapher bapher ka IPC, 1860 pyrshah ïa ka M/s CMJ University, Shillong, Meghalaya, Chandra Mohan Jha, ki dkhot ka ïing ka sem jong u kiba dei ki nongdonbynta jong ka M/s CMJ Foundation nalor kiwei pat ki briew halor ka jingkynnoh ba ki la ai syrnot thok ïa ki kyrdan jingpule sha ki hajar ngut ki samla da kaba pan pisa na ki. Ki don kumba 20,570 tylli ki syrnot kyrdan pule la shu ai beaiñ da ka M/s CMJ University.
Ha ka jingtohkit, ka ED ka la pynpaw ba hadien ba la dei ïa ki syrnot thok, ka pisa kaba ïohpdiang ha ki jaka kynshew pisa ha Bank la pynphai shawei pat na kawei ka bank shawei pat ha kiba bun tylli ki jaka kynshew pisa bad Mutual Fund kiba la plie bad ju thep pisa da ki dkhot jong ka longïing Jha.
Ka jingïaid jong ki kam runar ka long ba la bei ruh ïa ka pisa ha ka liang ki jaka puta kaba la kot sha ka T.83.52 klur.
Ka ED kham mynshwa ka la teh la khum ha ki kyndon aiñ ïa ki jingdon jingem kumba T.41.2 klur. Lada kheiñlang baroh ki jingdon jingem kiba la shah teh shah khum ha ka ED haduh mynta ka long T.48.76 klur bad ka jingtohkit ka dang ïaid shuh shuh ha kaba ïadei bad kane.
