New Delhi, Naitung:
Ka Delhi High Court ha ka sngi Balang ka la bishar bniah halor ka jingpan jamin jong u Myntri Rangbah ka Delhi u Arvind Kejriwal kaba ïadei bad ka mukotduma halor ka jingpyndkoh treikam hapoh ka tnat Excise bad ka la buh por shwa ban ai hukum halor kane ka bynta.
Ka ïingbishar ka la buh por shwa ruh ha kaba ïadei bad ka jingai hukum ba la pynibor pyrshah halor ka jingshahkem jong u Myntri Rangbah.Ha ka por ba la bishar, u nongïasaid aiñ jong u heh nongïalam ka AAP u la pyninia da kaba ong ba u”dei u Myntri Rangbah bad ym u lehnoh” ïa ubym lah ban ai jamin.Ka jingbishar kaba hashwa ka la long ha ka 2 tarik Naitung, ha kaba ka Justice Neena Bansal Krishna ka la bthah ïa ka kynhun Central Bureau of Investigation (CBI) ban ai jubab hapoh hynriew sngi.
U Abhishek Manu Singhvi, uba long u Senior Advocate, uba la mih khmat na ka bynta u Kejriwal ha ka jingbishar halor ka jingkyrpad jamin jong u hynnin ka sngi, u la ong ba um dei u lehnoh ïa ubym lah ban ai jamin halor ka nongrim ba u lah ban pynduh pyndam ïa ki sakhi sabut ne phet rieh na ka ri. “Ïa ka jingujor ejahar jong ka kynhun CBI la buh ha u bnai Nailar jong u snem 2022 bad hangne ym shym la pynpaw ïa ka kyrteng jong u Kejriwal.
Ha u bnai, Ïaïong jong u snem 2023, u la shah khot hajir hapoh ka jingtreikam jong ka kyndon 160 CrPC kum u sakhi”, la ong u Singhvi ha ïing bishar.”Ka Ïingbishar bahakhliehduh kam tharai ba u Kejriwal u lah ban pynduh pyndam ïa ki sakhi, lane un phet rieh sha England bad ka SC kan tynjuh halor ka jingpynshisha jong nga,” u la ai nia.
