Chennai, Naitung:
Ka Supreme Court, ka la pynsangeh noh ïa ka jingbthah jong ka Madras High Court, kaba dawa ïa ka sorkar Tamil Nadu, ba kan pynthikna ba ym dei ban shohdoh ïa ki masi ne khun masi ha katei ka Jylla.
Ïa kane ka hukum ba shipor la mynjur da ka ïingbishar jong u Justice Vikram Nath bad u Justice Sandeep Mehta ha ka por ba dang bishar ïa ka jingmudui jong ka sorkar Tamil Nadu kaba tuklar ïa ka rai jong ka ïingbishar bahakhlieh duh ha ka 27 tarik, Jymmang.
Ka ïingbishar bahakhliehduh ka la mynjur ban bishar ïa kane ka kam bad ka la pynmih ïa ka jingpynbna sha ki nongshah mudui.
Ka sorkar Tamil Nadu, ka la tuklar ïa ka hukum jong ka 27 tarik, Jymmang jong ka High Court, kaba la bthah ïa ki bor synshar jong ka jylla, ba kin pynthikna ba ym dei ban shohdoh ïa ki masi ne khun masi ha kylleng ka jylla, la ka long ha ka sngi shuwa jong ka Bakrid, ha ka 28 tarik, Jymmang, lane ha kano kano ka sngi.
