Washington, Naitung:
U President ka America, U Donald Trump, ha ka Sngi Balang, u la ong ba ka nongshun ba khraw jong ka Iran, ka la pyllait ïa kawei ka nongshong shnong jong ka America, kaba la shah set naduh u bnai Nohprah jong u snem 2024 bad ka la ailad ïa ka, ba kan mih noh na katei ka Ri.
“Ka la lait im mynta na ki kti jong ka Iran bad ka don ha ka jinglong- jingman kaba bha,” U Trump, u la thoh ha ka rynsan Truth Social jong u, da kaba bynrap, “Ka United States of America, ka sngewnguh ïa kane ka rai bad jingsngewthuh jong ka Iran da ka mon sngewbha jongka hi!”
U Trump, uba ha kine ki sngi ba la dep, u la hukum ban sdang biang ïa ki jingshah thombor pyrshah ïa ka Iran bad u la pynjari biang ïa ka jingkhang dam jong ki shipai duriaw ïa ki kad liengsuiñ jong ka – um shym la jer kyrteng ïa katei ka kynthei ne batai balei ba la bat ïa ka, lait noh tang ban ong ba la kum bat ne kem bakla ïa ka.
Hynrei uwei u nongiasaid aiñ u la jubab ïa ka jingthoh jong u Trump ha ka por janmiet jong ka Sngi Balang ban ong ba katei ka kynthei kaba la pyllait ka dei ka briew kaba u pyniasaid ma u lane ka ‘client’ jong u.
“Nga sngewkmen palat ban pyntip ba ka ‘client’ jong nga, ka Dena Karari, ka nongshong shnong jong ka US-Iran, kaba la shah bat noh sha Iran halor ki jingkynnoh thok ba ka ïatreilang bad ka ri kaba pyrshah bad ka kam syntiat, mynta ka la mih suk na Iran bad ka la don ha ka lynti ban leit phai biang sha America,” ong u nongïasaid aiñ u Jared Genser ha ka kyrwoh.
U la ong ba kaei kaba la khring ïa ki bor synshar jong ka Tehran sha ka Karari, ka dei ka jingpynïaid jong ka ïa ka Children of Mehr Foundation ka bym don jingmyntoi, kaba la ïarap ïa ki khynnah kiba duk ha Iran lyngba ki jingai sngewbha jong ki riew shimet.
“Katba ka dang shah set ha ka jingkhang ban mih da kaba pynbor, ka la shah tohkit da ki phew sien ha ka tnat wad bniah bad pahara jong ka Iran kaba pawnam bad watla kam shym la shah set satia ha ka met, hynrei ka la mad ïa ka jingeh kaba khraw ha ka met bad ka jingmut jingpyrkhat,” ong u Genser.
U la khot ruh ïa ka Iran ban pyllait noh ïa baroh kiba dang sah “ki nong America kiba la shah set phatok bakla bad kito kiba la shah khang ban mih da kaba pynbor bad baroh ki koidi saiñ pyrthei jong ka Iran.”
Ka Iran ka bat katto katne ngut ki nongshong shnong jong ka ri Sepngi bad la kynnoh ba ka pyndonkam ïa ki kum ki nongïakren ha ki jingïakren hapdeng ki sorkar.
Ha u bnai Naiwieng, ka Washington, ka la pynbna ba uwei u nongshong shnong jong ka Iran, uba don ïa ka jinglong nongshong shnong ba pura jong ka US, ula pyllait noh, hadien ba ula pyndep ïa ka jingshah set phatok kaba shi snem ha Iran.
Ka Washington bad ka Tehran, ki la ïa soi ïa ka soskular ha u bnai ba ladep, kaba thmu ban pynkut noh ïa ka thma Middle East, hynrei kitei ki riew ïaleh pyrshah, ki la pynthymmai ïa ka jingïaleh pyrshah, ha kaba ki jingïakhun, ki la sdang biang ha kylleng ka thaiñ.
