Hardford, Naitung:
Kawei ka ksew jong ka longïing, ka la thang da kaba bakla ïa ka ïing kaba la pynïap ïa lai ngut ki mrad bad ka la wanrah ïa ka jingjulor kaba la antad ba $150,000 ïa kawei ka ïing ha Harford County, Maryland, ha ka 10 tarik u Naitung. Ka jingjia kaba sniewbok, kaba la jia katba ki trai iing ki dang don shabar. Katkum ki dur ba la ioh ring dur lyngba ki camera CCTV ba la pyndait ha katei ka iing, la iohi ba kumno utei u ksew jong ki, u Bo, u long ka daw jong ka jingpluh kaba la bam duh ïa ki jingdon- jingem jong katei ka iing ha katei ka sngi.
Katkum ki khubor ba la iohlum, la iathuh ba katei ka ding, ka la klang ha kawei ka iing, kaba don ha ka block 4300 jong ka Foxglove Court ha Belcamp, jong ka Maryland. Hadien ba ki la bishar bniah ïa ki dur ba la shim na ki camera ba la pyndait hapoh katei ka ïing, ki nongtohkit ki la lap ba utei u ksew ba la ju khot u ‘Bo’, u la rung halor ka jaka shet jong ka kamra shetja bad u la pynmeh bakla ïa ka kor shet jingbam haduh ba ka la wanrah ïa ka jingpluh bad pynkem ding syndon ïa baroh kawei ka iing.
Katei ka kor shet jingbam ‘toaster’ ka la pynkem ding pat sa ïa kiwei ki tiar kiba kloi ban kem ding bad kiba don hajan jongka, kaba la sdang ïa ka ding kaba la saphriang stet lyngba ka iing. Ki heh pynlip ding ki la rai ba kane ka jingjia ka dei kaba shu jia ryngkhat, ha kaba ki dur ba la shim da ki camera pahara ki la iarap ïa ki nongpynlip ding jong ka jylla ban lap ïa ka daw.
Kumba 30 ngut ki nongpynlip ding ki la leit sha katei ka jaka bad ki la lah ban tehlakam ïa ka jingpluh hapoh kumba 20 minit eiei.
Ki para marjan ki la lah ban pynlait im ïa u Bo bad uwei pat u kulai, u Addie, na katei ka iing kaba la shah thang. Hynrei uwei pat u kulai uba lai, u Dakota bad ki ar tylli ki masi jong katei ka longïing, ki la ïap ha katei ka ding.
Ki heh sorkar ki la antad ba katei ka jingpluh ka la pynjulor ïa ki jingtei kiba haduh $150,000 bad sa $50,000 ha ka jingjulor ïa ki tiar kiba don ha katei ka iing.
Hadien katei ka jingjia, ki bor pynlip ding ki la kyntu ïa ki trai ïing ban pynjngai ïa ki tiar kiba lah ban kem ding na ki jaka shet jingshet bad ki tiar shet jingshet, khamtam ha ki ïing kiba don ki mrad kiba kwah tip. Ka NFPA ka ai jingmut ruh ban pyndonkam da ki jingtap jong ki tnum thylliej lane ban weng noh ïa ki tduh thylliej haba ki mrad ba ri ha ïing ki sah marwei, ban kiar na kaba iehnoh ïa ki jingbam ha ki thylliej ding, bad ban pynthikna ba la buh ïa ki tiar pynbna tdem kiba treikam ha baroh kawei ka ïing.
