Islamabad, Naitung:
3 ngut ki pulit ki la kyllon iap ha ka jingleit thombor jong ki lehnoh Pakistan, ha kaba 34 ngut kiwei pat ki la ngat bad mynsaw ha kitei ki ar tylli ki jingjia thombor, kawei pyrshah ïa ki kynhun pahara bad kawei pat ha ka stashon pulit bad baroh 2 tylli ki jingjia ki long ha kajuh hi ka thaiñ Khyber Pakhtunkhwa.
La ong ba kitei ki lehnoh ki la leit ban thombor ïa kawei ka kynhun pahara jong ki pulit ka Pakistan, kaba dang ap pahara hapoh ka distrik Lower Dir, da kaba kawang bom sha ka jaka ba don kitei ki kynhun pulit ha ka Sngi Balang, ha kaba 3 ngut ki dkhot pulit ki la khlad hashen bad 19 ngut pat ki la mynsaw ha katei ka jingjia.
Ki pulit ki iathuh ba kane ka la jia hajan ka thaiñ Ladam top hapoh Haider ha ka por ba kitei ki pulit pahara ki dang ïaid lyngba na katei ka jaka. La ong ba kitei ki lehnoh, ha kaba nyngkong ki la kawang tang da ki bom kawang kti ‘greenade’ bad hadien kata, ki la sdang ban ther kuli naphang sha katei ka kynhun pulit ha ka por ba ki dang pyrshang ban ïada ïalade.
Hapdeng katei ka jingkulmar, kitei ki runar kiba la ngeit ba dei ki lehnoh, ki la thang ruh ïa ar tylli ki kali pulit kiba don ha katei ka jaka.
Haba iadei bad kane, ïa kitei kiba mynsaw baroh la pynkit noh sha ki jakasumar bapher, naka bynta ki jingsumar ba bniah bad ba kyrkieh.
Ki pulit ki la ong ba yn sa iasam ïa ki jingtip ba bniah ynda la shai bha ka jinglong jingman. Naduh katei ka por ki bor pahara ki la ker kut ïa katei ka jaka bad ki la pynlong ïa ka jingkhynra ban lap ïa ki nongthombor ba shisha halor katei ka kam.
Ha kawei pat ka jingjia, ki bor pahara ki la pynduhjait ïa ka jingshah thombor ha Miryan Police Station ha ka distrik Bannu hadien ba ki la bat bad pynpra ïa kawei ka kali kaba la kit ïa ki tiar pynbthei shwa ba kan poi sha ka thong, la iathuh ki heh sorkar.
Saw ngut ki nongthombor ki la iap ha ka jingiasiat kuli. Ha katei ka jingshah thombor, ki don 15ngut ki pulit, ha kaba 10ngut ki la mynsaw jur. La phah ïa ki sha Peshawar district ban ioh ïa ka jingsumar.
U Ophisar Pulit jong ka Elaka Bannu, U Captain (Retd) Muhammad Furqan Bilal, u la pynthikna ïa katei ka jingjia bad u la ong ba dang bishar bniah ïa ka jinglong jingman, da kaba bynrap ba ïa ki jingtip ba bniah ha kaba iadei bad kiba mynsaw yn sa iasam hadien.
Katkum ki khubor ba nyngkong, ki nongthombor ki la pyrshang ban pynhap ïa ka kali kaba la pyndap bom shapoh thanat. Hynrei ki pulit, kiba la kyrshan da ki bor pahara, ki la siat, da kaba pynjot ïa katei ka kali shwa ba kan poi ha katei ka jaka.
Ki heh sorkar ki la iathuh ba hadien kata ki nongthombor ki la pyrshang ban hiar thma ïa ka thanat, hynrei la pynsangeh noh ïa katei ka jinghiar thma.
Ka kynhun pulit kaba heh bad kiwei kiwei ki bor pynjari aiñ ki la leit sha katei ka jaka, ki la ker kut ïa katei ka jaka bad ki la sdang ïa ka jingkhynra bad jingpynkhuid.
Ki bor pyniaid ki la iathuh ba ka jingtohkit ka dang iaid shakhmat, katba ïa ki jingtip ba bniah ha kaba iadei bad ki jingmynsaw, ki jingjulor bad kiwei kiwei ki bynta jong katei ka jingjia yn sa pynmih hadien ba la pynshisha.
Ha u bnai Risaw, ka jingshah bom kali suicide ha Domel Police Station ha Bannu, ka la pyniap ïa 5 ngut ki riew paidbah, katba 13 ngut kiwei pat ki la mynsaw, kynthup ïa uwei u pulit.
