Kolkata, Naitung:
Ka Supreme Court ka la weng noh ïa ka kynhun ki jingujor ba la mudui da ki nonghikai bad ki bym dei ki nonghikai jong ki Madrasa ba la ithuh ha West Bengal, da kaba pan ïa ka jingthung kam kaba man ka por bad ka jingsiew kaba la ai da ka grant-in-aid.
Haba pynmih ïa ka rai, ka kynhun nongbishar kaba don arngut ki Justice u Dipankar Datta bad u Augustine George Masih ki la ong ba ym don kawei ruh na ki 13 tylli ki test ba la bishar bniah da ka Kashari kaba la ai nongrim ban pynlait na kine ki nonghikai bad ki bym dei ki nonghikai jong ki Madrasa ba la ithuh ha West Bengal.
“Ngi la ïaid shakhmat halor ka nongrim ba lada uno uno na kine ki 13 ngut ki nongmudui u pynsngewthuh ïa ngi ban bat ha ka liang jong u, ngin sa bishar bniah ïa ki mukotduma kiba dang sah ruh kumjuh. Kaba sngewsih ka long ba ym don uwei ruh na ki 13 ngut ki nongmudui uba lah ban pynsngewtynnad ïa ngi,” la peit bniah ka kynhun nongbishar ha ka jingbishar jong ka.
Ka ïingbishar ha ka rai jong ka ka la ong ba ka la bishar bniah ïa ki jingdawa katkum ka hukum jong ka jong u snem 2023 kaba la thaw ïa ka komiti ban peit ïa ki jingsiew katkum ka skhim ai jingïarap jong ka Jylla.
“Namarkata, ngim shym la kyntait tang ïa ki jingdawa jong baroh 13 ngut ki nongmudui kiba la bishar bniah ïa ki mukotduma jong ki, hynrei ngi la kyntait ruh ïa ki jingdawa jong baroh ki nongmudui kiba dang sah. Baroh ki writ ki long kiba khlem jingmut bad katkum kata la weng noh.”
Katei ka jingïakajia, ka dei kaba ïadei bad ka aiñ jong ka West Bengal Madrasa Service Commission Act, 2008, kaba la thaw ïa ka Statutory Commission ban ai jingmut ban thung ïa ki nonghikai ha ki Madrasa kiba la ithuh.
Hadien kane, la pynngat ïa ka kynhun jong ki mukotduma ha ka ïingbishar jong ka Calcutta. Ha u snem 2014, ka ïingbishar kaba don tang uwei u nongbishar ka la pyndam noh ïa katei ka aiñ, ka rai kaba la pynskhem hadien da ka ïingbishar jong ka Division ha u snem 2015. Da kaba weng noh ïa baroh ki jingujor, ka ïingbishar ka la ïohi ba, “Baroh ki jingujor ba la thoh ki long ki bym don jingmut bad la weng noh katkum kata.”
Nangta ki nongmudui ki la pynkynriah sha ka ïingbishar bahakhliehduh da kaba ujor ïa ka jingkyrpad katkum ka kyndon 32 jong ka Riti synshar ka ri India, bad ki la tuklar ïa ka jingkyntait ban thung man ka por da ka komiti.
